Хрватски психолог советува: „Родителите што премногу им угодуваат на децата се токсични, какви последици оставаат врз нив?“

И родителите од кои децата се плашат, и оние родители кои се плашат да не ги вознемират своите деца се подеднакво токсични и можат да остават трајни последици врз менталното здравје на своите деца. Хрватски психолог објави видео со предупредување до родителите за да знаат какви личности создаваат и на што треба да внимаваат.

Ирена Орловиќ е невролингвистички психотерапевт која магистррирала во областа на науките за психо-социјално советување на Универзитетот Грац во Австрија. Нејзиниот живот значително се променил кога на 25 години се породила и лекарите ѝ соопштиле дека нејзиното девојче има сериозни пречки во развојот и дека можеби ќе живее само неколку години.

Но, Ирена одлучила да се посвети на борбата и да даде сѐ од себе за нејзиното девојче да израсне во девојка која е задоволна и среќна и денес има 22 години.

Со текот на времето, таа се трудела да стекне што е можно повеќе нови сознанија, а денес овие сознанија ги споделува во своите книги, но и на Инстаграм профилот каде се труди да укаже на важноста на комуникацијата меѓу децата и родителите.

Некои родители сметаат дека нивна главна цел е да бидат авторитет во животот на децата и на диктаторски начин се трудат да воведуваат ред и дисциплина. Но, има и онакви кои се плашат да не го вознемират детето или, пак, ќе направат сѐ за нивното дете да биде среќно.

Иако, навидум разликата меѓу овие два типа родители е огромна, Ирена нив ги става во истата категорија на „токсични родители“ кои оставаат сериозни последици врз менталното здравје.

„Знаете ли дека постојат два вида токсични родители? Тоа се родителите од кои децата се плашат и родителите што се плашат од сопствените деца. И едните и другите мошне токсично делуваат на менталното здравје на децата“ – вели таа.

Во продолжение, Ирена дава појаснување за тоа која е разликата меѓу овие два типа токсични родители, но и за тоа какви ментални последици оставаат врз сопствените деца.

„Родителите од коишто децата се плашат најчесто се родители кои кога ќе влезат во собата, нивните деца ќе направат сѐ, ќе бидат мирни, послушни, само за да не го изнервираат родителот. Ќе направат сѐ за да му угодат на родителот“ – појаснува таа.

Според неа, децата што израснале со вакви родители, во иднина најчесто ќе бидат зависни од авторитети и многу лесно ќе паѓаат под нивно влијание.

„Родителите коишто се плашат од децата повторно успеваат да израснат разгалени деца, кои едноставно немаат здрава слика за себе и за иднината, затоа што родителите им дале порака дека тие прават сѐ за нив.

Дека тие не треба да направат ништо, дека е доволно што постојат и со тоа им дале порака дека се целосно неспособни, така што тие деца во иднината ќе имаат високо мислење за себе.

Ваквите деца многу тешко ќе најдат вработување, ќе бидат неодговорни и постојано ќе веруваат дека некој нешто им должи и дека тие се посебни само затоа што постојат на овој свет.

Но, нив и најмалиот стрес може да ги скрши и значајно да делува на нивното ментално здравје затоа што немаат психолошка отпорност“.

Погледнете го нејзиното видео во целост:

Б. С. Б. | Црнобело