Уцена или добар потег: Мајка од Србија е хит на Инстаграм заради пораката што им ја оставила на децата

Дали е во ред на децата да им ја смените лозинката за интернет и да им ја дадете дури откако ќе ги завршат обврските? Една мајка стана хит во регионот откако на своите деца им остави необична порака.

Деца кои не сакаат воопшто ниту да помислат дека треба да помогнат со домашните обврски, а наместо тоа по цел ден се излежуваат пред телевизор или си играат на интернет...

Ова е секојдневието со кое што се соочуваат многу родители во денешно време, а една мајка испрати видео од својата досетлива порака што им ја оставила на своите деца и предизвика лавина од коментари.

Наместо да ги остави работите на случајност и од работа да ја дочека хаос, таа одлучила да ги натера своите деца да ги завршат обврските во домот, на досетлив начин.

На Инстаграм страната на српскиот портал „Зелена учионица“ е објавено кратко видео од пораката што една мајка одлучила да им ја остави на своите деца и условите што им ги дала за да им ја даде лозинката за пристап до интернет.

„Денешната лозинка за WiFi можете да ја отклучите со испраќање фотографија до мајка ви на Viber од чистата кујна.

Покрај тостерот на фотографијата мора да стои тетрапак амбалажата од млекото, со цел да се спречат злоупотреби, односно повторни употреби на стари фотографии.

Со љубов,
Мама“.

Очигледно мајката решила на децата да им го ограничи пристапот до неограничениот интернет, а им го оставила ограничениот мобилен интернет кој лесно може да го потрошат ако играат игри или гледаат видеа, но е сосема доволен за да пратат фотка на Viber или да се јават во итни случаи.

Реакциите за оваа порака на мајката во најголема мера се позитивни. Родителите сметаат дека ова е позитивен пример за тоа како децата треба да се научат дека имаат и обврски, а не само права.

„Јас и сестра ми секоја сабота моравме да го исчистиме станот. Немавме интернет, а ниту пак награда“;

„Децата се подготвуваат за живот, а преземањето обврски и одговорности е всушност животот“;

„Ова не е уцена. И ние мора да работиме за да имаме нешто“ – стои во дел од коментарите.

Што мислите вие? Дали ваквата порака е непотребна уцена или пак генијален начин да се научат децата дека треба да си ги преземат обврските?

Б. С. Б. | Црнобело