Најопасните предмети во детска соба, според доктори од брза помош

Секоја година има илјадници случаи на деца кои се повредиле од греалки – некогаш бидејќи ги допреле, некогаш бидејќи ги покриле и предизвикале пожар…

Оние кои работат во брза помош, најдобро знаат кои се најчестите повреди со кои се соочуваат луѓето, вклучувајќи ги и децата.

Според нив, повредите кај децата стануваат почести штом тие научат да одат.

Затоа, важно е родителите да ја направат детската соба што е можно побезбедна.

За Huffington Post, неколку доктори споделуваат кој се најопасните работи во детската соба:

Неприцврстени полици и шкафови

Една од најстрашните и најсериозните повреди со кои можат да се соочат децата е врз нив да падне полица или шкаф

На возраст кога сакаат да истражуваат, децата неретко пробуваат да се качуваат по мебелот, особено кога родителите не ги гледаат.

Затоа, добро прицврстете ги овие елементи во детската соба.

Кабли, јажиња и слично што претставуваат ризик од давење

Докторка од САД вели дека не се така ретки случаите кога дечиња се заплеткале во јажето за ролетните.

Затоа, најдобро е да ги закачувате надвор од дофат на децата.

Друг чест проблем можат да бидат и долгите кабли, особено ако се среде собата.

Ако мора да има долг кабел во собата, прицврстете го покрај ѕидот и осигурете се дека нема опасност детето да се сопне од него.

Кревети на кат

Иако заштедуваат простор, креветите на кат можат да бидат опасни за мали деца.

Децата сакаат да се качуваат, но и да скокаат на креветот, па ризикот да паднат и сериозно да се повредат е огромен.

Греалки

Секоја година има десетици илјади случаи ширум светот каде што деца се повредиле од греалки.

Некогаш тие може да ја допрат греалка и да се изгорат. Некогаш и може да ја покријат со нешто, па да предизвикаат пожар.

За греење во детската соба идеално би било да ставите клима.

Ако не сте во можност, никако не го оставајте детето само со вклучена греалка.

Подни ламби

Кога децата трчаат низ собата, многу е лесно да ја бутнат подната ламба и да се повредат.

Ако сакате дополнително светло, подобра алтернатива се ѕидните ламби или ламбите кои се прицврстуваат за биро.

Спирова С. | Црнобело