Родителите во 1985 vs. родителите во 2015

Родителите воопшто немаат едноставна улога, а на грижите и воспитувањето никогаш им нема крај. За жал никој не може да учи од претходната генерација како да се справува со проблемите на кои наидува.

Ако некогаш проблемите кои ги имаа родителите беа како да го натераат своето дете да се прибере дома, денес прашање е како би можеле да го натераат да излезе надвор и малку да се социјализира со врсниците...

Слична е ситуацијата и со начинот на исхрана... Ако порано децата требале да се молат да јадат, денес прашање е како ќе ги одвикнете од брзата и нездрава храна.

Ако направиме една мала ретроспектива, постојат неколку работи по кои се разликуваат децата и родителите во своето однесување и воспитните мерки кои ги употребуваат:

Родителите во 1985-та година:„Напиши прво домашна, па можеш да излезеш.“

Родителите денес: „Домашна? Пак ве малтретираат со глупости?“

Родителите во 1985-та година: „Нема станување од маса додека не го изедеш лебот.“

Родителите денес: „Синко, ако не сакаш компир манџа, земи пари од мојот паричник и купи си сендвич.“

Родителите во 1985-та година: „Синко цел ден си на улица, ќе ти текне да се прибереш дома?“

Родителите денес: „Добро, со недели си дома седнат пред тоа таблетот, ќе излезеш на воздух малку?“

Родителите во 1985-та година: „Не ме интересира што прави Давид, ти нема да излегуваш до 11 часот.“

Родителите денес:  „До кога излегуваат твоите другари? Јави ми се кога да те земам од диско или земи пари за такси.“

Родителите во 1985-та година: „Не ме интересира кој прв почна и двајцата ќе јадете ќотек.“

Родителите денес: „Мајкини престанете со расправање, ајде ќе одиме ќе купиме уште една маица за да не се тепате.“

Родителите во  1985-та година:  „Излегувај, ама внимавај што правиш, памет во глава.“

Родителите денес: „Кога ќе се вратиш? Гледај да не биде рано наутро... Ако има нешто, ѕвони ми на мобилен.“

Родителите во 1985-та година: „Пак те казни учителката? Што направи сега?“

Родителите денес: „Укор? Каков укор, веднаш одам да се расправам со неа. Како смее така да се однесува?“

Родителите во 1985-та година: „Оди купи леб, ако ти остане кусур купи си турбо базука или лижавче со мастика.“

Родителите денес: „Купи јајца и еве ти стотка ако сакаш нешто да се почастиш“