Како редоследот по кој сте родени влијае на вашиот карактер?

Сигурно досега сте слушнале дека најстарото дете во семејството обично е поодговорно, а единците се разгалени и себични. Но, дали овие црти се само стереотипи или има нешто точно во нив?

Како, според тоа кое дете по ред сте родени, ви се гради карактерот?

Теоријата дека редоследот на раѓање го одредува карактерот започнала да се развива уште во 1920-та година благодарение на Зигмунд Фројд и неговиот колега Адлер.

Тие биле убедени дека:

Првороденото дете е конзервативно, насочено кон тоа да стекне моќ и да стане лидер. Бидејќи постарите деца често ја преземаат одговорноста за своите помлади браќа и сестри, првото дете кога ќе порасне станува грижливо, повеќе има желба да стане родител и поголема е веројатноста да преземе иницијатива.

Второроденото дете често се бори да го/ја надмине својот/а постар брат или сестра, па и темпото на развој и достигнување зрелост е побрзо. Средните деца во семејството често се амбициозни, но ретко се себични. Често си поставуваат нереално високи идеали и цели, па заради тоа и почесто се соочуваат со поголеми проблеми во животот.

Детето кое е родено последно по правило добива најмногу внимание и грижа од родителите, па дури и од постарите браќа и сестри. Токму заради тоа, во животот немаат доволно искуство и често се зависни од туѓото присуство. Но, и покрај тоа, обично се многу мотивирани да ги надминат своите постари браќа и сестри. Често стануваат спортисти, музичари или уметници. По природа се неверојатно дружељубиви.

Единецот во семејството нема со кого да се натпреварува, а бидејќи целата грижа му е посветена само на него, обично до крајот на животот очекува некој да се грижи за него. Обично е зависно од другите луѓе. Многу деца кои немаат браќа и сестри стануваат перфекционисти и тежнеат да ги остварат своите цели без разлика на сè.

Неодамна, популарно стана верувањето дека редоследот на раѓање има влијание и на интелигенцијата. Истражувачите од Универзитетот во Лајпциг на основа на испитување на 20.000 луѓе откриле дека постарите деца обично имаат повисок скор на тестот за интелигенција.

Едно истражување направено на 377.000 средношколци во Америка открива дека првородените имаат тенденција да бидат искрени и доминантни, но се помалку комуникативни и не се отпорни на стрес. Средните деца се совесни и одговорни. Најмладите се отворени и комуникативни. А, единците се нервозни, но и истовремено комуникативни.

Н. Г. | Црнобело