5 типови на мајки што ги среќаваме на летување

Летото е во полн ек, а сезоната на сончање и капење веќе започна. Родителите ги водат своите деца на разладување, а посреќните мајќи меѓу нив, успеваат и самите за себе да пронајдат момент на оддишка и одмор од секојдневните обврски.

Доколку појдете на базен, езеро или, пак, море, како во земјата, така и во странство, ова се петте типови на мајки што неизбежно ќе ги забележите:

1. Мајка со мали деца

Ќе ја препознаете по купот гуми и мускули за пливање кои ги носи со себе, додека живее во постојан страв дека децата ќе ѝ се удават. Не ѝ замеруваме – малите деца во вода се ноќна мора за секоја мајка. А, нејзините малечки завчера научиле да одат, вчера првпат влегле во вода, а денес веќе мислат дека се професионални пливачи. Трчаат по ивиците од базенот, скокаат во длабокото и се прскаат до бесвест. На госпоѓата не ѝ е нималку лесно.  

2. Децата-да-не-бидат-гладни тип на мајка

Во една торба ѝ се реквизитите за на плажа, а во другата - смоки, чипс, гуми за џвакање, бомбони, сокови, кекси, чоколатца, сендвичи, лижавчиња, праски, мандарини, јаболки, цреши, кикирики, леден чај...После неа, муштериите во локалната продавница ги очекува непријатно изненадување, затоа што таа комплетно ги опустошува полиците. А, уште „повесело“ е ако со себе носи и рачен фрижидер.

3. Мајка со мисија за заштита од сонце

Вообичаено, таа лежи под чадорот за сонце, во панталони и блуза со долги ракави. На главата носи шешир, а во раката везден ѝ е кремата со заштитен фактор 50. И нејзините деца, секако, облечени се на сличен начин, па не знаете дали дошле на сончање и капење, или, пак, се подготвуваат да пешачат преку пустината Сахара.

4. Мајка која „голта“ книги и магазини

Децата ѝ се веќе потпораснати, па не мора и понатаму да води сметка за нив во секој можен миг. Таа ужива на лежалката со своите омилени љубовни романчиња и модни магазини, без ниту една грижа на овој свет. Кога тоа ќе ја умори, тука се социјалните мрежи - статусите, селфи фотките, чекирањата и сè останато по ред. Но, ако, таа и заслужува конечно да се опушти, по првите напорни години од мајчинството.

5. Згодна мајка

Мајката за која не сме сигурни дали повеќе ја мразат, или, пак, ѝ завидуваат останатите жени. Таа изгледа феноменално за своите години. Капењето за неа не е само време за одмор и разонода, туку и тренинг, во чиј тек може да поработи на своето тело, кондиција, но и да им покаже на сите која е најдобрата пливачка меѓу мајките. Кога не е во вода, таа се шета наоколу како да е на модна писта, додека ги рекламира своите тренди крпчиња и скапи очила за сонце. Кога подобро ќе размислиме, сепак повеќе ја мразат.

 М. А. | Црнобело