„Сакајте ја како што ја сакам јас“ - моќна порака на мајка што ја дала ќерката на посвојување

Со скршено срце изјавила дека не е доволно добра за да биде мајката што нејзината ќерка заслужува да ја има.

Судијката Сара Линч од Велика Британија откри дека во нејзината судница дошла мајка која донела многу храбра одлука. Жената се соочувала со ментални проблеми и затоа одлучила да ја даде нејзината ќерка на посвојување.

Таа напишала емотивна порака до луѓето кои ќе ја посвојат нејзината малечка. Открила дека не е доволно добра за да биде мајката што нејзината ќерка заслужува да ја има и дека секогаш ќе ја сака, а ова го прави за неа.

Мајката долги години се борела со ментални проблеми и изјавила дека најважна ѝ е иднината на нејзината ќерка.

Имињата и годините на мајката и ќерката се држат во тајност, но на виделина излезе дел од нејзиното писмо.

„Се чувствувам неверојатно тажно поради ситуацијава, но знам дека ќе оди во семејство кое ќе ѝ го даде тоа што не можам јас. Еден миг можам да се грижам за неа, а веќе следниот не и тоа не е фер кон неа.

Навистина жалам што дојде до оваа ситуација, но знам дека ја правам вистинската работа и само сакам да знае дека ја сакам и засекогаш ќе ја сакам.“, напиша таа и им порача на идните родители на нејзината ќерка „Сакајте ја како што ја сакам јас“.

Социјалните служби процениле дека девојчето нема да биде безбедно со нејзината биолошка мајка и ниту еден член на семејството не бил во состојба да ја преземе одговорноста и грижата за неа.

С. С. | Црнобело