Како да му помогнете на вашето бебе да ги издржи летните горештини?

Многу мајки ги облекуваат нивните деца со дебела облека дури и во летните топли денови, од страв дека ќе студи. Но, на бебињата не смее да им биде жешко и треба да ги ослободите од непотребната облека.

Во овој период треба да обрнете посебно внимание на облеката на вашето бебе. Ако вам ви е топло во блуза на долги ракави, ќе му биде топло и на вашето дете. Немојте да се плашите дека ќе се разболи ако го соблечете.

Студените раце или стапала на бебето не се знак дека му е студено. Можете лесно да проверите дали на детето му е топло – доколу има пот на вратот, главата или пазувите, облечете му полесна облека.

Сепак, доколку сонцето пече, може да го облечете во долги ракави, но облеката да биде од лесен материјал.

Ситните црвени точки што можат да се појават на телото на бебето, најчесто под пазувите и на вратот, се сигурен знак дека му е топло.

Па, редовно освежувајте го со капење, а избегнувајте ги мрсните креми бидејќи ги затвораат порите и не ѝ дозволуваат на кожата да дише.

Кога станува збор за летната облека, гледајте да биде лесна, со светли бои и од материјал што впива. Најдобро е да одберете памучна облека, а да ја избегнувате синтетиката.

Доколку бебето е изложено на сонце за време на прошетката, не заборавајте да му ставите шешир или капа. Избегнувајте ги и носилките од дебел материјал бидејќи брзо ќе се загреат од топлината на вашето тело и високата температура.

Доколку имате двор и често влегувате и излегувате од домот, температурата во затворената просторија треба да биде 3-4 степени пониска од надворешната.

Исто така, не дозволувајте климата или вентилаторот да дуваат директно во вашето бебе, туку сместете го подалеку од изворот на ладење.

Спирова С. | Црнобело / фото: depositphotos.com