Како бебето да ја преспие цела ноќ?

Повеќето родители ќе се сложат дека ноќното будење на бебето знаат да биде извор на сериозен стрес во првите неколку месеци од родителството.

Исцрпеноста и раздразливоста сериозно зависат од спиењето на бебето, па како да се обидете да го доведете до ред?

За да не „дежурате“ по цела ноќ, додека бебето да порасне и да си го фати редот, обидете се од првите денови да го направите овој режим:

- Денот нека биде полн со стимулации, зборувајте му на бебето, играјте си, не ги придушувајте светлата, правете го тоа на природна светлина, не го стишувајте телевизорот, не одете на прсти...

- Веднаш по раѓањето на бебето одредете распоред и држете се до него: бањање, повивање, хранење, пеење песнички и заспивање. Овие шаблони правете ги со придушени светла и во иста просторија.

- Бебињата во текот на првите недели се будат поради сопствените движења. За да се чувствува посигурно, повијте го правилно, како би се чувствувало заштитено, како додека е во стомакот.

- Потрудете се да не го земате бебето во раце секојпат кога ќе се разбуди. Дајте му шанса само да презаспие.

- Може да се обидете да го нахраните/надоите бебето додека спие, пред да почувствува глад, како би го спречиле будењето. Нема да успее секојпат, но вреди да се обидете.

- Бебето секогаш нека спие во иста просторија и на иста температура.

Напомена: Ова се неколку совети со кои може да се обидете да воведете ред во спиењето на бебето, но секое бебе е различно, како и навиките и методите на семејствата и родителите, па ова не значи дека со сигурност ќе успеете, со оглед на тоа што е сосема очекувано бебето да се буди често. Сепак, вреди да се обидете. 

М. Д. | Црнобело