Зошто бебињата се мирни кај некои луѓе, а кај некои плачат?

Новороденчињата имаат изострено сетило за мирис, па кога ќе им се приближи непозната личност, односно личност со мирис што не го препознаваат, можно е да почнат да плачат.

Некои новороденчиња се мирни без разлика дали се во рацете на родителите, роднините или личност што ја гледаат првпат. Но, некои бебиња плачат не само покрај странци, туку дури и кога се покрај нивната баба, нивниот дедо или роднина што веќе го виделе неколкупати.

Па, која е причината за ова?

Мирисот има голема улога

Сетилото за мирис е едно од најразвиените кај новороденчињата, па тие многу се потпираат на него. Тие можат да го препознаат мирисот на нивната мајка, а можат да ги запомнат и препознаат мирисите и на другите членови на семејството.

Кога ќе се соочат со странец, односно за нив непознат мирис, ова може да ги натера да се расплачат.

Новороденчињата преферираат симетрични лица

Едно истражување покажало дека за новороденчињата е многу полесно да распознаваат симетрични лица, па сосема возможно е повеќе да им се допаѓаат личности со такво лице. Односно, кога ќе се соочат со личност што ја гледаат првпат, помала е веројатноста да заплачат ако нејзиното лице е симетрично. 

Тие можат да препознаат дали некоја личност е добра

Одамна постои верувањето дека бебињата распознаваат добри и лоши личности, а едно мало истражување го потврдило ова.

Според истражувањето, бебињата можеле да оценат дали некој е лош или добар со набљудување на неговите постапки и изразите на неговото лице.

Овие резултати, пак, ги тераат истражувачите да мислат дека способноста за распознавање добро и лошо можеби ни е вродена.

Страв од странци

На околу 3-месечна возраст, бебињата веќе можат да распознаваат дали некоја ситуација им е позната или не. Поради ова, кога се во близина на странец можно е да се чувствуваат напнато од непознатата ситуација, па да почнат да плачат.

Бебињата можат да заплачат дури и ако им пријде роднина или член на семејството што го имаат видено само еднаш доколку не им се даде време да се адаптираат.

Страв од разделба од родителите

За бебињата, мајката и таткото се најважните личности, па нормално е да чувствуваат страв од помислата дека ќе бидат одделени од нив. Тие се многу приврзани за родителите, па некогаш стравот може да биде навистина интензивен.

Овој страв може да ги натера да плачат, дури и ако се со личност што веќе ја знаат.

Спирова С. | Црнобело