Приказната зад хорор-играчката Huggy Wuggy која ја обожаваат и децата во Македонија, а стана мета на критики

Играчката позната како Huggy Wuggy e инспирирана од лик од хорор-видеоигра, чие дејство иако е сместено во фабрика за играчки, не е воопшто соодветна за деца. Всушност, и компанијата која стои зад играта вели дека не ја направиле за мали деца, туку за поголеми гејмери.

Ако имате дете, голема е веројатноста да ви побарало да му ја купите играчката позната како Huggy Wuggy.

Навидум, ова се обични кадифени играчки, но дефинитивно имаат малку вознемирувачки изглед.

Највпечатлива е морничавата насмевка на играчката која изгледа дури чудовишно. Играчката има и велкро лепенки на рацете за да може да ве „прегрне“.

Родителите, пак, се поделени во врска со оваа играчка – некои сметаат дека е најобична играчка и нема за што да се загрижуваат, додека други сметаат дека премногу вознемирувачка за мали деца.

Па, од каде потекнува оваа играчка и дали воопшто е соодветна за мали деца?

Играчката е инспирирана од лик од хорор-видеоигра – Poppy Playtime – која е достапна бесплатно за Android и iOS уреди, како и за Windows.

Во играта, играчот е поранешен вработен во фабрика за играчки. Тој ја посетува фабриката, која е напуштена, откако пред десет години сите вработени исчезнале без трага.

„Треба да останете живи во оваа хорор-авантура со загатки. Пробајте да ги избегнете одмаздољубивите играчки кои ве чекаат во напуштената фабрика за играчки.

Истражувајте ја мистериозната зграда… и не дозволувајте да ве фатат“, стои во официјалниот опис на играта на Steam.

Додека се движи низ фабриката, играчот треба да решава загатки, но и да се справува со морничави суштества чиј дизајн е инспириран од детски играчки.

Популарната Huggy Wuggy играчка е всушност главниот негативец со којшто се соочува играчот во играта.

На видеото во продолжение можете да погледнете како изгледа играта на компјутер:

Како што спомнавме, ова е хорор-видеоигра, но бидејќи дејството е сместено во фабрика за играчки, многу родители сметаат дека е соодветна за деца.

Поради ликовите инспирирани од играчки, речиси веднаш откако се појави на пазарот, играта почна да се споделува на Јутјуб канали за деца, па веројатно оттаму нивната заинтересираност за играчката.

Официјално, играта нема возрасна граница, но компанијата која стои зад неа (MOB Games) вели дека не е препорачлива за деца помали од осум години, како и дека не ја направиле играта за деца.

Всушност, повеќето хорор-видеоигри со вознемирувачки сцени не се наменети ни за малолетна публика, уште помалку деца. 

Оние, пак, кои ја играле играта споделуваат дека во неа има вознемирувачки сцени, особено со ликот Huggy Wuggy, и истакнуваат дека играта не би требало да ја играат деца помали од 13-14 години.

Додека самата играчка што ја критикуваат многу родители можеби не е опасна за деца помали од 13 години, видеоиграта дефинитивно не е наменета за мали деца и не е препорачливо да ја играат.

Спирова С. | Црнобело