Отстранување шминка, подочници – За што сè можете да користите рицинусово масло?

Ја обновува кожата, го стимулира растот на косата, а може да ги намали и брчките - постојат безброј работи за коишто можете да употребите рицинусово масло.

Рицинусовото масло го стимулира создавањето на колаген и еластин и со тоа ја намалува појавата на брчки, поради што е хит во продуктите за зрела кожа. 

Покрај тоа, делува и на намалување на појавата на митесери, но позитивно влијае и на растот на трепките, косата и веѓите.

Исто така, го има и во козметичките производи за раст на ноктите, но и против опаѓање на косата.

Секако, пред да почнете да користите масло на кожата, консултирајте се на дерматолог и прво тестирајте го на мала површина, особено ако имате проблематична кожа.

Во продолжение, уште неколку придобивки од ова масло:

Ја обновува оштетената кожа на петите

На влажна кожа нанесете голема количина од маслото и облечете памучни чорапи.

Ова е најдобро да го направите пред спиење, за маслото да има време да делува.

Негува испукани усни

Едноставно, нанесете капка рицинусово масло на усните и оставете да делува. 

Можете да го користите и како замена за сјај - изгледа одлично поради густината на маслото.

Одлично е за отстранување шминка

Ова чудо од масло се наоѓа во средствата за отстранување шминка, а можете да го измешате со друго масло, како што е сончогледовото и ќе добиете природен производ. 

Наменет е за сите типови кожа, од сува до масна.

Делува како хидратантно средство

Производителите додаваат рицинусово масло во козметиката и производите за лична нега, како што се лосиони, мелеми и кремови.

Сепак, рицинусовото масло може да се користи и самостојно, како хидратантен крем. 

Ако е густо, измешајте го со крем или масло од кокос или од јојоба.

За подочници или ситни брчки

Масните киселини во рицинусовото масло можат да го поттикнат обновувањето на кожата и да ја намалат појавата на лузни од акни и брчки, а можете да го користите под и околу очите за да ги измазните ситните брчки предизвикани од сувоста на кожата и да ја осветлите бојата на подочниците.

С. Ш. | Црнобело / фото: freepik.com