6 грешки поради кои косата ви е сува како слама по фарбање

Ја миете многу често, си легнувате со мокра коса и не користите соодветни продукти за нега.

Косата третирана со фарба е нормално да биде посува. Но, ова значи дека штом ќе ја офарбате, треба да ја промените и негата.

Ако косата ви делува суво, како слама, можеби правите некоја од следниве грешки:

Ја миете многу често

Маслата што се лачат од скалпот имаат и заштитна улога. Па, ако ја миете косата секој ден, ја отстранувате оваа заштита и таа станува посува и покршлива.

Фарбаната коса и онака е малку посува, па со честото миење само го влошувате овој проблем.

Обидете се да ја миете косата до двапати неделно, а во деновите помеѓу можете да користите и шампон за суво миење.

Не ја хидрирате

Ако имате фарбана коса, никако не треба да ги прескокнувате продуктите како регенератор и маска.

Исто така, препорачливо е да користите и масла за коса, како кокосово, кои дополнително ќе ја хидрираат. Можете да го ставите маслото околу ден час пред да ја измиете косата.

Ја изложувате на многу висока температура

Високата температура ја суши косата.

Затоа, немојте да ја миете со жешка вода, а кога ја стилизирате со пегла или фигаро, секогаш ставајте и продукт кој штити од топлина.

Исто така, немојте да го користите фенот на највисока температура.

Ја прескокнувате соодветната нега

Постојат посебни продукти за фарбана коса кои е препорачливо да ги вметнете во рутината.

Нема потреба да купувате безброј посебни продукти, туку оние што веќе ги користите, осигурете се дека се за фарбана коса.

Спиете со мокра коса

Кога е влажна, косата е покршлива. Па, ако си легнете пред да ја исушите, во текот на ноќта ќе ја искинете.

И, ќе почне да изгледа како слама.

Ја фарбате многу често

Ако водите добра грижа за косата, бојата би требало да си ја задржи истата нијанса најмалку еден месец, па и повеќе.

Па, не треба да ја фарбате косата почесто од еден месец.

Ако, пак, бојата не го изгубила сјајот и по овој период, доволно е да ги офарбате и само корените.

Спирова С. | Црнобело