Фризури и техники за фарбање со кои побрзо ќе си ја вратите природната боја на косата

За да ја имате вашата, природна боја на коса, треба да ја чекате косата да порасне. Но, постојат техники за фарбање и некои фризури кои малку ќе ве доближат до природната боја, па со тоа полесно ќе ја поминете транзицијата.

Скоро секоја девојка кога ќе наполни доволно години за да може сама да носи одлуки, веднаш решава да ја промени бојата на косата.

Кога една жена сака некаква промена, секогаш прво на памет ѝ паѓа да ја промени бојата на косата.

Но истовремено, секоја жена која ја фарбала својата коса, барем еднаш добила желба да ѝ се врати нејзината природна коса.

Како побрзо да ја вратите вашата природна боја?

Обидете се со пократки фризури

Ако не сакате да се фарбате, единствениот начин да ја вратите природната боја е да ја почекате косата да порасне или да се потрстрижите пократко.

Девојките генерално се плашат од фризерските ножици, но боб-фризурата во последно време е сѐ попопуларна, па токму тоа може да ве натера да ја скратите вашата коса.

Препорачливо е да ги потстрижувате врвовите, додека на крајот не ја потстрижете целата фарбана коса од која сакате да се ослободите.

Освен тоа, косата ќе ви биде здрава и без расцветани врвови.

Фарбајте се во вашата природна боја

Ова е еден од поочигледните начини да си ја вратите природната боја.

Најтешкиот дел е да погодите нијанса на боја која е иста како вашата природна, но доколку успеете, растот на коренот подоцна нема воопшто да се забележува.

Потоа можете да ја оставите да расте и да ја потстрижувате одвреме-навреме.

Направете балајаж

Кога косата ќе ви порасне доволно, а темниот израсток ќе почне да ве нервира, можете да направите третман кој многу ќе ја олесни транзицијата. 

Балајажот ќе ја освежи вашата коса, ќе го скрие растот и ќе ја подготви за промената што ја посакувате. 

Овој третман не мора ни да го правите многу често бидејќи подраснатите корени нема ни да се забележат, што значи брзо ќе ѝ се вратите на природната боја.

Прамените се секогаш тренди

Ако вашата природна коса е посветла и сте решиле да ја обоите потемно, немојте дополнително да ја оштетувате со депигментација - особено не сами. 

Затоа одлучете се за посветли прамени кои ќе го сокријат растот на коренот, а преминот од темно на светло ќе биде постепен, но и многу поздрав.

Потоа само ќе треба да ја чекате да порасне.

Негувајте ја косата

За вашата коса побрзо да расте, важно е да ја негувате. 

Тоа значи дека освен шампон и регенератор, треба да изберете маска која одговара на вашиот тип на коса.

Погрижете се шампоните што ги користите да не содржат сулфати, бидејќи тоа е силно средство кое освен нечистотиите, ги уништува и здравите масла на вашиот скалп, па може да ја направи косата сува и испукана.

С. Ш. | Црнобело / фото: freepik.com