Зимски проблеми за убавина и брзи решенија

За разлика од летниот период кога сè е послободно и поспонтано, па како и да ни изгледа косата може да делува симпатично или ако немаме шминка на лицето под сонцето е само поприродно, во зима сè е малку потешко.

Ограничени сме во однос на изгледот, но и условени од многу фактори. Ветрот ни ја суши кожата, ни ја мрси косата, студот ни ги поцрвенува образите и носот, шминката мора да е подобра за да ги скриеме сите недостатоци...

Сепак, постојат 4 типични и најчести зимски проблеми и 4 брзи решенија за нив:

1. Електрицитет на косата

- Кога ќе ја извадите капата косата ви лета на сите страни?

Решение: Пред да излезете од дома, на дланките напрскајте малку лак за коса и поминете низ косата. Така влакната ќе си фатат свое место.

2. Нос кој се лупи

- Настинките тешко се избегнуваат овој период, а со тоа и испуканата кожа околу ноздрите. Затоа треба претходно да сте подготвени.

Решение: Редовно правете пилинг, мачкајте го носот со хранлива крема и користете меки марамчиња. Ако сепак продолжи да ви се лупи кожата, намачкајте ја со подебел слој вазелин додека седите дома.

3. Сива и безживотна кожа

- Кожата ви изгледа суво и уморно?

Решение: Спасот не е во темната пудра или солариумот, туку во хајлајтерот. Нанесете го високо на јаболчниците, под веѓите и во аголот на очите. Ова може да виде вашиот омилен зимски трик за разубавување.

4. Заплеткана коса

- Девојките со долги коси знаат каков проблем може да настане поради зимските додатоци како капи, шалови.

Решение: Набавете регенератор за суво нанесување или спреј за расчешлување, а кога можете косата собирајте ја во висок кок, пунџа или плетенки.