5 трикови за убавина кои лесно може да ги ископирате од Французинките

Ах, тој неодолив француски шарм! Нивниот стил е познат како еден од најскладните во светот, а дури и кога не се некои убавици, Французинките изгледаат заводливо, шармантно и толку гламурозно.

Лежерниот став кон животот се одразува и на нивната гардероба, но и чантичката за козметика, баш како и правилото дека е подобро да вложите во неколку квалитетни парчиња, отколку да се затрупате со евтини крпчиња и невкусна шминка.

Ви откриваме 5 правила за убавина кои лесно може да ги преземете од овие елегантни и фасцинантни жени:

1. Негата на кожата нека ви биде на прво место

Французинките ретко ставаат пудра, а уште поретко го задушуваат лицето со преголема количина на шминка и козметички производи. Тие сакаат нивната кожа да дише и изгледа природно, па редовно ја чистат и негуваат, а попрво вложуваат во добра крема, отколку во најнов бронзер.

За да добиете „француски тен“, добро ќе ви дојде коректор кој ќе ги прикрие малите несовршености, односно транспарентна пудра која ќе го отстрани несаканиот сјај, и тоа без боја. Притоа, не се ни обидувајте да ги сокриете пегите или лузните на лицето.  Французинките би ви рекле дека токму тие детали ве прават тоа што сте и ви даваат карактер. Слободно заборавете и на руменилата во жарки бои и „хајлајтерите“, барем на некое време.

2. Нашминкајте ги или очите или усните

Французинките сакаат убав кармин на усните, но никогаш нема да го носат со јака сенка на очите или светло руменило. Ја имаат усовршено и помалку размачканата линија со моливче и класичниот мачкаст потег со туш за очи, но ги комбинираат само со голи усни. Запомнете – секогаш треба да истакнете само една работа на лицето!

3. Косата секогаш мора да изгледа природно

За разлика од Американките, Французинките не патат за фризури кај кои секое влакно е на свое место. Напротив, сакаат да изгледаат како штотуку да поминале неколку часа забавувајќи се, а не седејќи во фризерскиот салон, па нивната коса е секогаш суптилно разбушавена. Таквиот изглед е лесно да го постигнете, доколку имате добар фризер кој квалитетно ќе ја потшиша и бојадиса вашата коса.

4. Одберете препознатлив мирис  

Нека вашиот парфем биде ваш потпис. Кога ќе го пронајдете оној кој најдобро го опишува вашиот карактер – држете се до него!

5. Спијте, пијте многу вода, љубете и уживајте

Среќната жена е најубава жена, па нека тежнеењето за опуштен живот полн со мали задоволства, биде една од најголемите тајни на вашиот добар изглед.

М. А. | Црнобело