Мирисливи тетоважи – нов летен хит

Роза, хортензија, божур или можеби рузмарин? Претстојното лето, во тренд ќе бидат флоралните и хербални тетоважи што мирисаат.

Летото ни пристига за неколку дена, а со него ни ги носи и омилените привремени тетоважи. Оваа сончева сезона, посебно „ин“ ќе бидат мирисливите тетоважи. Трендот е релативно нов, но веќе на големо се шири на социјалните мрежи Инстаграм и Пинтерест.

Брендот „Tattly“ прв ги претстави привремените цветни тетоважи, кои покрај атрактивниот изглед, прекрасно и мирисаат. Формулата на билна база им осигурува трајност на тетоважите од 2 до 4 дена, во текот на кои тие интезивно мирисаат.

Покрај мирисот, освојуваат и со дизајнот, затоа што тетоважите се со преубави цветни и билни мотиви, а изгледаат како да се насликани со водени бои. Во понудата се два сета на тетоважи – цветни и хербални.

Цветниот сет содржи четири тетоважи со цветови на хортензија, роза, како и розов и виолетов божур, а мирисните ноти кои ги шири се циклама, афион, топола и иланг-иланг.

Хербалниот сет, пак, опфаќа тетоважи со жалфија, рузмарин и мајчина душица, а аромите се движат од мајчина душица и италијански бергамот, преку рузмарин и жалфија, па сѐ до мошус и сандаловина.

Тетоважите се водоотпорни, а трајноста може да им се продолжи со нежно миење. Зависно од желбите и вкусот, секогаш може да се одбере само еден мотив, но и да се направи цел цветен букет, мирисајќи како пролетна расцутена ливада.

М. А. | Црнобело