Фаворити на трендсетерките: Топ летни фризури за девојките со долга коса

Ако може да се суди според бројот на објави, но и лајкови на популарната социјалната мрежа Инстаграм, долгокосите влијателни дами одбраа неколку хит фризури за сончевата сезона.

Летните месеци се веројатно единственото годишно доба, кога дамите со раскошна коса, радо би се замениле со оние кои имаат пократки фризури.

Причините се јасни. Поради високите температури и силните сончеви зраци, невозможно е да ја носите целосно распуштена. Надвор е пеколно жешко.

Сепак, ова не значи дека секогаш мора да ја врзете во коњско опавче или пунџа. Напротив. Постојат мноштво можности за фризури со кои ќе го „преживеете“ летото, а воедно ќе и бидете во тренд.

Од морето супер стилски идеи, ви ги издвоивме фаворитите на трендсетерките, односно топ петте летни фризури за девојките со долга коса:

1. Полукрената коса

Сѐ уште е во мода фризурата која пред неколку години се врати од ерата на ’90-тите.

Ова е најлесниот начин да ја тргнете косата од лицето, покажувајќи ја притоа нејзината должина.

Заврзете полурепче или или полупунџа, зависно од вашите желби и можности.

 А, доколку додадете и штосен ластик – тотално сте „ин“.

2. Бохо плетенки

Плетенките траат минимум еден ден и се одлично решение за летните горештини, па се омилен избор на девојките за сончевите месеци.

Актуелни се и класичните, како и секогаш модерната рибина коска, но ткн. „pipe“ плетенка е во склад со најновите трендови.

Лесно е да се сплете – само побарајте инспирација на профилите на познатите фешнистки.

Фризурата важи за хит на овогодинешните летни фестивали.

3. Коса со шноли

Ако сакате да ја тргнете косата од лицето, летово посегнете и по шноличките, кои исто така се вратија во мода од ’90-тите.

Тие го преплавија Инстаграм буквално преку ноќ. Зависно од тоа каков патец најдобро ви стои, може да закачите по една шнола на секоја страна, или, пак, да нанижете неколку шноли само од едната страна на лицето, кадешто имате повеќе коса.

Трендот ги освои познатите манекенки, блогерки и фешнистки, па лесно ќе ве наговорат и вас одново да се вљубите во аксесоарот што го обожававте во детството.

4. Фризура со марама

Доколку не ви се троши време на испробување нови фризури, или, пак, едноставно не сте талентирани за нешто такво, тогаш ова е вистинскиoт избор за вас.

На својата класична летна фризура, било да се работи за коњско опавче или пунџа, додадете марама, која е хит детаљ на сезоната.

Моментално е најпопуларно да ја заврзете околу главата, а може да си поиграте со разни други начини на врзување, правејќи машна или обична лента.

Можностите се големи, а важна улога игра и бојата, односно дезенот на марамата што ќе ја одберете.

5. Прамени околу лицето

Ова е уште еден начин да ја надградите својата типична летна фризура без многу маки.

Заврзете ја косата, така што ќе оставите неколку прамени кои му даваат облик и контури на лицето.

Покрај ласкавиот ефект, за миг ќе изгледате поопуштено и во летно расположение.

Една од промотерките на лежерниот „неуреден“ изглед е и војвотката од Сасекс, Меган Маркл.

Кој е вашиот летен фаворит?

М. А. | Црнобело