Ламинација на веѓи, пополнети усни и уште 3 трендови за убавина кои царуваат во женскиот свет

Веќе неколку години наназад јапонското исцртување на веѓите е особено популарно кај жените. Особено кај сите оние кои ги истенчија веѓите во текот на ’90-тите години, а подоцна се покајаа поради постапката.

Неколку трендови за убавина се посебно популарни кај девојките во изминатиов период. Додека едни се борат со природното стареење, но уживаат во секој момент од истото, други не можат да поднесат да гледаат нови брчки, несовршени веѓи или ненагласени трепки на себе. 

Секогаш го цениме природниот изглед кај жените, но сепак секој има право да одлучи што ќе прави со своето лице - дали ќе се негува на природен начин или сепак ќе „потпадне“ на трендовите кои ги наметнува општеството. 

Ниту едните, ниту другите не грешат, а иако им се восхитуваме на оние кои се одлучуваат природно да стареат и да блескаат со природниот изглед, сепак и оние кои се одлучуваат на козметички процедури, сè додека одлуката е донесена одвнатре, заради своја лична желба, а не заради тоа „што ќе кажат другите“ - имаат зелено светло.

Кои се најпопуларните трендови за убавина?

Микроблејдинг (јапонско исцртување) на веѓи

Уште познато како „јапонско исцртување“ на веѓите, оваа техника на исцртување дава потполно природен изглед, бидејќи не се пополнува целата форма, туку, со посебна техника, се цртаат тенки и закривени влакненца во правец на нивниот природен раст.

Ламинација на веѓи

Lamination brow или ламинација на веѓите e хемиски третман со кој се подигаат природните влакна и се добиваат густи и оформени веѓи, без разлика на формата или дебелината на природните. Третманот вклучува и фарбање на веѓите.

Свилени трепки

Метод на надградување на трепки кои се лепат влакно по влакно на природните влакна од трепките. Изгледаат природно и „слеано“ со окото, а може да заборавите на маскарата, бидејќи нема повеќе да ви биде потребна.

Пополнување усни со хијалуронска киселина (филери)

Т.н. филери се користат за инјектирање на хијалуронска киселина во кожата. Освен што ги решава проблемите со брчки, ова е идеално решение за брзо пополнување на усните. Третманот со хијалуронска киселина е нехируршки, а ефектот трае од неколку месеци до максимум 1 година.

Дермаплејнинг – третман за лице

Dermaplaning е козметичка процедура со која се отстрануваат горните слоеви на кожата со помош на остро сечило. Постапката има за цел да ги отстрани брчките и длабоките лузни од акните, како и да ја направи површината на кожата мазна.

Напомена: Сите процедури се прават од страна на стручно лице, со претходна консултација.

(О)Милена | Црнобело