5 чувари на здравата и густа коса – што треба да направите за да ја зајакнете?

Бујната коса е сон на секоја жена, но и на секој маж. Сепак, различни фактори влијаат на намалувањето на волуменот на косата.

За да ја зачуваме нејзината убавина мора да се грижиме за косата, но понекогаш не можеме да се справиме со многуте производи и го загрозуваме најубавиот украс третирајќи го со различни хемикалии.

Дали некогаш сте се запрашале што може да направите за да ја подобрите густината на вашата коса?

Сите доживуваме мал шок кога ќе забележиме колку всушност ни паѓа косата или ни е проретчена.

Но, овие 5 супстанции ќе го спречат непријатниот процес, бидејќи вистинската убавина и здравје започнуваат одвнатре:

Биотин

Биотин (витамин Б7) е важен за нашите клетки. Недостатокот на овој витамин може да предизвика опаѓање на косата, исип на кожата и кршливи нокти. Бременоста и доењето, како и земањето на одредени антибиотици ја намалуваат неговата концентрација во телото.

Повеќето луѓе го добиваат потребниот биотин од храната. Биотинот се наоѓа во многу видови на храна, особено во млекото, сирењето, црниот дроб, жолчката, кикиритките, грашокот, зеленчукот, габите и квасецот.

Железо

На црвените крвни клетки им треба железо за да им носат кислород. Ниското ниво на железо може да предизвика анемија, што резултира со замор, бледа кожа и опаѓање на косата.

Ова се само дел од намирниците коишто се природно богати со железо: црвено месо, зелен лиснат зеленчук, мешунки.

Витамин Ц

Витаминот Ц е моќен заштитник на правилното функционирање на организмот и е неопходен за апсорпција на железото. Затоа се препорачува да се комбинираат храната богата со железо со храната којашто е богата со витамин Ц.

Добри извори на витамин Ц се: агрумите, зелениот лиснат зеленчук, црвените пиперки, цитрусните овошја.

Витамин Д

Можеби веќе знаете дека витаминот Д е важен за коските, но дали знаевте дека недостаток на овој витамин е поврзан со опаѓањето на косата? Недостатокот на витамин Д исто така може да предизвика и депресија.

Кожата произведува витамин Д кога сме изложени на сончева светлина, но многу луѓе не можат да го внесат доволно овој витамин на ваков начин.

Затоа е потребно да се внесува преку храна богата со него или да се зема како додаток во исхраната. Земањето на магнезиум во комбинација со витамин Д ќе ја подобри неговата биорасположливост. 

Витаминот Д го има во: риба и рибино масло, млечни производи, говедски црн дроб, млеко од соја.

Цинк

Цинкот игра важна улога во производството на протеини во косата. Знаците на недостаток на цинк вклучуваат опаѓање на косата, слабо заздравување на раните и нарушено чувство за вкус или мирис.

Бременоста, доењето, болестите на дигестивниот тракт и болестите на бубрезите може да го намалат нивото на цинк во организмот. Затоа е неопходно да се вклучи повеќе храна од типот на школки, грав, месо, ореви, риба, како и морска храна, и производи од цели зрна.

(О)Милена | Црнобело