Софи (27) храбро ја носи седата коса: „Првото бело влакно ми порасна на 13 години, ги кубев – но залудно“

Софи од Нов Зеланд открива дека како што си ги кубела белите влакна на 13 години, така тие повеќе почнувале да растат, но кога имала 25 години решила да си ја прифати седата коса и да престане да се фарба. 

Софи Мекграт која сега има 27 години, вели дека првото седо влакно на косата си го видела на 13 години. Го искубала со пинцета и воопшто не ѝ било грижа, но вели дека по ова седите влакна почнале да растат сè повеќе и побрзо.

„Продолжив да ги кубам седите влакна во периодот од следните неколку години, а на возраст од 15 години почнав да ја фарбам косата“ – вели Софи за Daily Mail Australia.

Софи ја фарбала косата секој месец во период од 10 години, сè додека на возраст од 25 години не одлучила во целост да ја прифати седата коса таква каква што е.

„Никогаш и не помислив дека може да ја оставам природната боја на косата, но можеби тоа е така затоа што бев премногу млада“ – вели таа.

Додава дека нејзината самодоверба била мошне падната заради косата затоа што се чувствувала дека мора постојано нешто да крие.

„Фарбањето на косата се претвори во нешто на што мислев постојано. Сфатив дека тоа што се чувствував како постојано да треба да ги покријам седите влакна ми создаваше повеќе стрес од самата седа коса.

Никогаш не се чувствував посигурно за тоа како изгледам отколку сега кога белата коса ми се гледа во целост“ – вели таа и додава дека откако престанала да се фарба чувствува како нејзината коса е поздрава, помека и поблескава од порано.

Вели дека била инспирирана да ја остави седата коса откако видела жена на Инстаграм како ја прифаќа седата коса на 30 години.

„Сфатив дека слично како и другите луѓе што ја прифаќаа нивната седа коса и јас не се срамев од моите бели влакна. Тоа што отстапив од вообичаеното ми даде самодоверба да го направам и во другите области од животот и навистина сум среќна што го направив тој чекор“ – вели таа.

Што се однесува до причините за прераното појавување на седите влакна, таа напомнува дека кај неа за седата коса е заслужна и генетиката, затоа што нејзините родители и двајцата имале седи коси на возраст од 40-тина години, но, тие не биле во толкава мерка седи како што била таа.

„Можеби таа комбинација од гени значеше дела ми било предодредено да ми обели косата додека бев млада. Мајка ми исто така престана да се фарба кога беше во средните 40-ти години и ја прифати седата коса“ – вели Софи.

Инаку, одлуката на Софи да ја остави природната боја на косата дошла околу една година пред да стапи во брак со нејзиниот партнер. На фотографиите од нејзината свадба можеме да ја видиме Софи со доста израснат корен и обоени врвови.

Б. С. Б. | Црнобело