Парфемот подолго време ќе го задржи мирисот - Козметички производи што треба да се чуваат во ладилник

Голем број од нас веруваат дека козметичките производи треба да се чуваат во бањата или во тоалетната масичка во спалната соба, но треба да знаете дека изложувањето на висока температура, влажноста и топлата пареа може да влијаат врз квалитетот на вашите омилени производи.

Во продолжение погледнете листа на производи што би требало да ги чувате во ладилник:

Природна козметика

Најголем дел од козметичките производи содржат состојки што ги штитат од расипување доколку ги чувате на собна температура, но доколку сте од оние што за себе избираат органска или природна козметика тогаш треба ваквите продукти да ги чувате во ладилник.

Истото правило важи и за сите производи што ги правите сами од природни состојки. Поради тоа што немаат додатоци, ваквите производи може да се расипат за само неколку часа, па затоа се препорачува да се чуваат во фрижидер.

Козметички производи со активни состојки

На самите упатства за употреба на козметичките производи за убавина штo содржат активни состојки како ретинол, витамин C и пептиди пишува дека треба да ги чувате на ладно место. Доколку ги ставите во ладилникот ќе ги заштитите производите од тоа да ја загубат својата ефикасност.

Ова правило важи и за производите што во себе содржат пробиотици.

Крем за очи

Кремите за очи исто така треба да се чуваат во ладилник. Прво затоа што ниските температури при нанесувањето ќе придонесат за стеснување на крвните садови и ќе ви помогнат за намалување на отоците околу очите.

Доколку сте од оние што сакаат да нанесуваат студени производи на лицето, во ладилник можете да ги чувате и кремот за лице и козметичките спрејови.

Парфем

Сте забележале ли дека со текот на времето мирисот на вашиот омилен парфем како да се губи. Тоа што вашиот омилен парфем ќе го чувате во ладилникот ќе ја пролонгира ефективноста на активните состојки во него.

Исто така на овој начин ќе го заштитите парфемот од изложеност на сонце и високи температури со што ќе го спречите испарувањето.

Козметички маски за лице

Козметичките маски за лице, особено оние што се на база на гел – треба да се чуваат во ладилник. Ниските температури ќе им овозможат на маските да ви помогнат во стеснувањето на ситните капилари на лицето и во намалување на црвенилото.

Моливчиња за очи

Тврдите и меки моливчиња за очи добро е да ги чувате во ладилник или да ги ставите таму 10-тина минути пред да ги користите. На овој начин тие ќе се стврднат и ќе бидат полесни за нанесување.

Кармини и балсами за усни

Најголемиот број кармини и балсами за усни се направени од козметички восок. На високи температури може да се случи овие производи да се стопат.

Доколку сакате да ги вратите во употреба, сè што треба да направите е да ги ставите во фрижидер. Ќе ви биде потребен околу 1 час за карминот повторно да можете да го користите. За да избегнете вакви ситуации, најдобро е да го чувате во ладилник.

Во ладилник не треба да се чуваат производите на база на глина, регенератори за коса, како и сите производи што се на база на масла, како серуми. Исто така, во ладилник не треба да ги чувате лаковите за нокти – со текот на времето само ќе се згуснат и ќе станат потешки за нанесување.

Б. С. Б. | Црнобело/ Фото: freepik.com/ pexels.com