Ретро трикови за убавина што ќе ви користат и денес

Знаевте ли дека можете да си направите пилинг за тело со обичен шеќер или дека можете да ги извиткате трепките со лажица?

Нашите баби ги немале продуктите за убавина што ни се достапни денес, а поради ова биле навистина креативни.

Неретко користеле предмети и продукти што веќе ги имаат во домот, а дел од нивните трикови сигурно би сакале да ги пробате и денес.

Ретро трикови за убавина што ќе ви користат:

Вода од ориз за лице

Водата од ориз се прави многу едноставно – ставете половина шолја ориз во три шолји вода. Оставете го оризот барем половина час и потоа прецедете ја водата.

Во минатото, водата од ориз била популарен продукт за убавина бидејќи е одличен извор на витамини и антиоксиданти.

Обично се користи како тоник и се нанесува на чиста кожа, а се верува дека со честа употреба може да го изедначи тенот на кожата.

Виткање трепки со лажица

Виткачите за трепки се изум кој кај нас е релативно нов. Но, ова не значи дека жените не се снаоѓале и без него.

Можете да ги извиткате трепките со обична лажица – ставете маскара и држете ја лажицата на очниот капак, над трепките, со вдлабнатиот дел кон окото. Нежно притиснете ги трепките на лажицата и држете неколку секунди.

Нормално, подобар резултат би добиле со виткач, но овој трик е одличен во миговите кога немате при рака.

Виткање коса со крпчиња

Искинете стара маица или крпа на долги ленти и извиткајте ја косата со нив, исто како со виклери.

Најдобро е да ги оставите преку ноќ.

Ставете вазелин на прстите пред да се лакирате

Ако не сте многу прецизни со лакот за нокти, на кожата околу секој нокт нанесете малку вазелин пред да се лакирате.

Бидејќи вазелинот е многу мрсен, ќе ја заштити кожата од лакот за нокти и многу лесно ќе ги отстраните грешките.

Кармин наместо руменило

Кармините со црвени и розови нијанси можат да заменат руменило.

Нанесете малку од карминот на јаболкниците и добро размачкајте го.

Во овој случај е важно да ја погодите вистинската нијанса за вашата кожа, па најдобро прво тестирајте го карминот на раката.

Пилинг со шеќер

Обичниот шеќер може да биде одличен продукт за пилинг.

Можете да го измешате со малку кокосови масло или евтин лосион за тело и нежно измасирајте ја кожата пред туширање. Немојте да притискате многу за да не ја иритирате кожата.

Можете и да си направите пилинг од талог од кафе и шеќер.

Спирова С. | Црнобело