„Засрамувачки“ симптоми и проблеми со здравјето кои не треба да ги криете од лекарот

Промени на брадавиците

Жените никогаш не треба да ги игнорираат промените на градите, вклучувајќи ги и брадавиците.

Ако забележите каква било промена, консултирајте се со лекар бидејќи кога станува збор за рак на дојка, раната детекција може да биде клучна за успешно лекување.

Неволно испуштање урина

Уринарната инконтиненција претставува неволно испуштање урина, односно неможност да се контролирате кога имате потреба за мокрење.

Без разлика колку ви е срам да разговарате за ова, сепак станува збор за симптом кој не треба да го игнорирате.

Важно е да знаете дека не е така ретка појава и може да биде предизвикана од разни причини, вклучувајќи инфекции на уринарниот тракт, инфекција или иритација на вагината, но и некои лекови.

Некогаш причината се и ослабени карлични мускули.

Појава на влакна на невообичаени места

Кај жените постојат неколку здравствени состојби кои можат да предизвикаат појава на влакна на невообичаени места, како лицето или градите.

Овде спаѓаат и проблеми како синдром на полицистични јајници и хормонални промени, па немојте да ја игнорирате оваа појава.

Сексуално преносливи болести

Многу луѓе се срамат да се консултираат со лекар кога се сомневаат дека имаат сексуално пренослива болест, најмногу поради мислењето дека ќе бидат критикувани или осудувани.

Но, овие болести се многу честа појава, вие не сте единствените што сте се заразиле со нешто, а со соодветен третман, повеќето од нив се лекуваат релативно лесно.

Хемороиди

Хемороидите се навистина честа појава и се претпоставува дека се јавуваат кај речиси половина од населението.

Ако забележувате симптоми како болка при одење во тоалет, крвав измет и болка или чешање во аналниот отвор, голема е веројатноста да имате хемороиди.

Консултирајте се со лекар бидејќи постојат третмани кои ќе ви помогнат да се ослободите од непријатните симптоми.

Спирова С. | Црнобело