Фиброаденоми (чворови на дојката) - како настануваат и како се лекуваат?

Оваа грутка на градите може да порасне и до 10 сантиметри и да предизвика компликации. Доолку почувствувате топче при допир на градите, задолжително посетете лекар.

Фиброаденом е неканцероген (доброчуден / бениген) тумор на дојка, кој најчесто се јавува кај адолесцентките и девојките и жените под 30-годишна возраст. 

Фиброаденом најчесто се опишува како чвор на дојката.  

Не предизвикува болка, но неговата големина може да варира и да предизвика непријатност под кожата.

Овој тумор се зголемува за време на менструалниот циклус и за време на бременоста, што е последица на хормонските активности во телото.

Може да порасне од 1 до 10 сантиметри и најчесто е во облик на топче.

Кога треба да посетите лекар?

Ако почувствувате грутка на градите која почнува да се зголемува, задолжително посетете доктор.

Иако фиброаденомот не е опасен, состојбата мора редовно да се следи.

Исто така, треба да посетите лекар ако се појавила нова грутка која ви изгледа поинаку или е придружена со различни симптоми - на пример, исцедок од брадавицата, може да укажува на рак на дојка.

Компликации кај фиброаденом

Иако овие тумори не влијат врз појавата на рак на дојка, ризикот може да се зголеми ако имате комплексен фиброаденом кој содржи абнормални цисти или густи акумулации на соли на калциум - калцификати.

Доколку планирате бременост, се препорачува да го отстраните фиброаденомот бидејќи може да расте за време на бременоста под стимулација на хормони.

Покрај зголемувањето во текот на бременоста, фиброаденомот се зголемува и за време на доењето.

Доколку фиброаденомот е поголем, може да ги блокира млечните канали и потоа да настанат дополнителни компликации.

Дијагноза

Дијагнозата се поставува врз основа на анамнеза, клиничка слика, ултразвук и патохистолошки наоди.

Лекување

Лекувањето е хируршко. Кај жените до 25 години, ако туморот е до 1 сантиметар не се предлага операција.

Промената се следи на 3 месеци. Некогаш се случува и спонтано да исчезне.

Фиброаденомите кои се многу големи или брзо растат, мора хируршки да се отстранат.

Сепак, лекар-специјалист најдобро ќе ја процени вашата состојба и начинот на третирање, па задолжително направете преглед доколку забележите нешто невообичаено. 

С. Ш. | Црнобело / фото: Pexels