Здрави и брзи појадоци полни со витамини

Ако сè почесто го прескокнувате појадокот заради тоа што немате доволно време наутро, време е да се навикнете да консумирате едноставни, а здрави појадоци. Кошничката со овошје нека е секогаш полна и при рака.

Ова се неколку идеи како да приготвите едноставен, лесен и здрав појадок.

Овошје и кашкавал – Исечкајте едно јаболко на ситни парченца и неколку коцки кашкавал. Фрлете неколку ситно сецкани оревчиња или бадеми за да го подобрите шмекот и вашиот појадок е спремен.

Овошен шејк – Ако знаете дека ве чека напорен ден, овошните шејкови никогаш не ги избегнувајте. Во блендер ставете неколку јагоди, малини, капини или било какво овошје по избор и додадете една чаша јогурт или млеко од соја.

Мини здрави сендвичиња – Ако имате околу 10тина минути повеќе, почестете се со здрави сендвичиња. На интегрален леб намачкајте сè што имате здраво  во фрижидерот и додадете зеленчук. На пример направете комбинација од павлака, моцарела и шери домати. Додадете малку маслиново масло и кари или оригано.

Енергетски бар во комбинација со јогурт - Никогаш не заборавајте енергетските здрави житарки да ги комбинирате со чаша јогурт со ниска масленост.

Житарки со овошје – Одберете ги вашите омилени житарки и комбинирајте ги со сушено или свежо овошје. Растопете ги со топло млеко или пак густа павлака, ако уживате во благо-солените вкусови.