Труење со храна или стомачен вирус: Како да ги разликувате?

Иако стомачните вируси и труењето со храна се манифестираат на мошне сличен начин, од особена важност е да се утврди за што точно станува збор.

Имам закачено некој вирус или ручекот не беше во ред? Повеќето луѓе не умеат да ги разликуваат симптомите на стомачен вирус од оние на труење со храна, но не е за изненадување. Симптомите се толку слични што е навистина тешко да се направи разлика. Сепак, одредени стомачни заболувања се опасни и со сериозни последици доколку не се дијагностицираат и лекуваат навреме, предупредуваат лекарите, па од особена важност е да се утврди за што точно станува збор.

Како да ги препознаете и лекувате? Ви откриваме во продолжение:

Причини

Всушност, и стомачниот вирус, и труењето со храна ги предизвикува некаков вирус или бактерија, а разликата е само во начинот на кој сте изложени на заразата. Труењето со храна се случува кога консумираат храна која е заразена со патоген, додека стомачниот вирус може да се пренесе на повеќе начини, а најчесто преку контакт со заразена личност.  

Размислете каде сте биле и што сте правеле во последните 24 часа. Дали сте дошле во контакт со заразена личност, или, можеби, сте заборавиле да ги измиете рацете пред јадењето?

Симптоми

Постојат низа заеднички симптоми што ги споделуваат стомачните вируси и труењето со храна, како што се: грчеви во стомакот, покачена температура на телото, ладна пот, мачнина, дијареја, намален апетит, болки во мускулите и зглобовите, главоболка и повраќање.

Сепак, она на што треба да обрнете внимание е времето на развој на симптомите:

При труење со храна, симптомите се јавуваат неколку часа по изложеноста на заразата, додека кај стомачниот вирус треба да поминат од 24 до 48 часа од заразата до првите симптоми.

Исто така, важно е да го имате предвид и времето кое ви е потребно за оправување:

Симптомите на труење со храна би требало целосно да се повлечат за неколку дена, додека оние на стомачниот вирус може да ве измачуваат и цела недела.

Лекување

Правилната хидратација на организмот и одржувањето на нивото на електролитите под контрола се важни во двата случаи, советуваат докторите. Сепак, избегнувајте купување на сокови од продавница, бидејќи може дополнително да го вознемирите желудникот. Попрво одлучете се за вода, незасладен чај од нане или или препарати за рехидратација кои може да ги набавите во аптека.

Што се однесува до храната, најдобро е да јадете банани, двопек и ориз, а да пиете  природен сок од јаболка. За неколку дена, кога симптомите ќе се смират, можете полека да ги воведувате и останатите намирници во исхраната.

Важно: Симптомите како дехидратација, крв во столицата, абдоминални болки и нагло губење на тежината никако не смеете да ги игнорирате. Доколку се појават, веднаш обратете се за лекарска помош.

М. А. | Црнобело