За безгрижно лето: Како да избегнете труење со храна?

Летото е период кога треба посебно да внимаваме како ја чуваме храната и што внесуваме во организмот.

Топлите денови носат потенцијални опасности по здравјето, особено во однос на труење со храна, поради високите температури и зголемената влажност на воздухот кои предизвикуваат размножување на бактерии.

Придржувајте се кон следниве совети за да немате проблеми со труење во текот на топлите месеци:

1. Кога патувате на некое место, никогаш немојте да пиете вода ако не сте сигурни дека е добра за пиење. Распрашајте ги локалните жители за квалитетот и потеклото на водата од чешма.

2. Не пијте пијалаци кои долго време стоеле во шише или во чаша.  

3. Задолжително мијте ги рацете пред секое подготвување на храна. Овошјето и зеленчукот нека бидат убаво измиени, без разлика дали има или нема лушпа.

4. Раздвојте ги намирниците во фрижидерот. Свежото месо и рибата треба да бидат одвоени од овошјето, зеленчукот и млечните производи.

5. Одржувајте ја правилната температура во фрижидерот. Оптимална температура за фрижидерот е 4 степени, а -18 степени во замрзнувачот.

6. Кога сте на некое непознато место, внимавајте во кои ресторани јадете. Избегнувајте непроверени ресторани, улични продавници за брза храна или места во кои ќе забележите лоши хигиенски услови.

7. Избегнувајте храна со многу сосови во неа, како и недоволно термички обработени месо, риба или морски плодови.

М. В. | Црнобело