Бременост во лето: Како полесно да ги поднесете топлите денови?

Бременоста е еден од најубавите периоди во животот на една жена. Но, со себе носи многу искушенија и физички потешкотии: болки во грбот, болки во градите, немирен сон итн.

Со зголемување на температурата надвор, се зголемуваат и непријатностите. Бремените жени се чувствителни на топлина поради зголемување на телесната температура и тежината.

Со овие неколку совети ќе можете полесно да ги поднесете летните горештини и безгрижно да уживате во бременоста:

1. Носете лесна и удобна облека од памук или други природни материјали. Исто така, одморете ги стапалата со удобни обувки, како што се платнените еспадрили, во кои кожата може да диши. Обувките нека бидат на мала платформа.

2. Кога сте во можност, подигнете ги нозете за да го намалите притисокот и отоците кои се јавуваат во бременоста, особено во летниот период.

3. Пијте што е можно повеќе течности. Задржувањето на водата во организмот придонесува за појава на отоци.

Пиењето повеќе течности освен што го освежува телото, спречува инфекции на уринарниот тракт.

4. Бидете физички активни со лесни вежби. Во летниот период се препорачува пливање, без нагли покрети и без да се уморите. Ако сте во базен, можете да правите и вежби за рацете и нозете.

Посетувајте базен само кога водата е чиста и нема многу луѓе.

5. Не ги заборавајте кремите со заштитен фактор, и тоа најмалку СПФ 30. Во бременоста, излегувањето на сонце е штетно не само поради тоа што кожата може да изгори, туку и поради тоа што на лицето може да се појават темни дамки.

Избегнувајте долго седење на сонце – штетно е и за вас, и за бебето.

М. В. | Црнобело