Една третина од двојките се кара околу температурата: На жените им е постудено отколку на мажите

Од мускулна маса и циркулација до женскиот хормон естроген, зошто жените сакаат повисока температура во домот од мажите?

И додека преку ден периодов сонцето сѐ уште не радува, навечер температурите паѓаат и започнуваме со користење на грејни тела.

Дали сте знаеле дека вечната битка околу контролата на термостатот е причина поради која се караат една третина од двојките?

Една неодамнешна студија во Велика Британија, како и една од 2015-та година во Холандија, покажаа дека жените се чувствуваат пријатно на температура од 24-25°C (Целзиусови степени), што е за 2.5°C повисока отколку температурата што им годи на мажите.

Четири од 10 жени тајно ја зголемуваат температурата на термостатот зад грбот на своите партнери.

Иако температурата на телата на мажите и жените е слична, односно околу 37°C, перцепцијата на надворешната температура зависи и од кожата, која кај жените е потенка.

Друго истражување покажа дека просечната температура на рацете на жените кога се изложени на ниски температури е за 3°C пониска од кај мажите. Дури и женскиот хормон естроген е фактор за тоа.

Тој ја намалува циркулацијата на крвта во капиларите на делови од телото како прстите со подзатворање на капиларите кога е студено.

Исто така научниците велат дека на жените им е уште постудено кога овулираат и нивоата на естроген се повисоки од вообичаено.

Интересно е што и метаболизмот на телото има улога. Мажите имаат побрз метаболизам поради повисоката мускулна маса. Нивниот крвен проток е повисок и со тоа им се загрева телото.

С. С. | Црнобело