Зошто косата опаѓа за време на диета?

Кога конечно сè си доаѓа на свое место со килажата, многумина ги плаши една страшна пропратна појава на диетите. Одеднаш забележуваат дека бројките на вагата стануваат сè помали и помали, но почнува и сè повеќе и повеќе да им опаѓа косата. Дали е ова нормално и постои ли причина за загриженост? 

Одговорот го дадоа повеќе експерти за Women's Health, објаснувајќи ги причините поради кои на некои луѓе им опаѓа косата за време на диета. Кен Л. Вилијамс, специјалист за трансплантација на коса, на таа тема вели: „Клинички и анегдотски, познато е дека губењето на косата се поврзува со нагло намалување на тежината или слабеење поради стрес.“

Бет Ворен, регистриран диететичар и нутриционист, исто така потврдува дека опаѓањето на косата може да биде резултат на губење на тежината.

 „Сè е до нутритиентите“, истакнува Фатима Коди Стенфорд, доктор од болницата во Масачусетс. „Луѓето често не внесуваат доволно протеини кога ги губат килограмите, па организмот мора да одлучи каде да ги испрати протеините што ги добива. “

„Бидејќи косата не е неопходна за опстанок на човекот како живо суштество, таа ќе ги добие „остатоците“. Мнозинството протеини ќе бидат насочени кон поважните органи и делови од телото, што доведува до губење на косата.“, дообјаснува Стенфорд.

Не грижете се - привремено е!

„Кога ќе запре процесот на слабеење, косата сама се обновува.“, уверува Ворен.

Доколку, пак, сакате да изгубите што повеќе килограми, а да го намалите губитокот на кoса, тогаш станете посвесни за количината на протеини што ја внесувате на дневна основа. Препорачаниот износ е 46 грама за жени, односно 56 грама за мажи.

Не е лошо да го зголемите и внесот на цинк во диетата, бидејќи е клучен минерал за раст на косата, но и ноктите и здравјето на кожата.

За таа цел, ќе ви биде од полза зеленчукот, како брокула и спанаќ, потоа овошјето, како авокадо и смоква, или, пак, консумирањето протеини од животинско потекло, како јајца и посно говедско месо. Од помош е и цинкот во облик на додаток за исхраната.

Во меѓувреме, повторувајте си: „Ова е само привремено!“

 М. А. | Црнобело