Колку пластика внесуваме во организмот секој ден?

Без разлика дали пиете од пластични чаши или купувате со пластични кеси, секој од нас доаѓа во контакт со пластика неколку пати дневно. Но, колку всушност е штетно ова?

 

Едно истражување открило колку пластика завршува во организмот на просечен човек, а бројката навистина ќе ве изненади.

Истражувањето од Универзитетот Викторија покажало дека просечниот Американец консумира над 70.000 честички микропластика секоја година. Особено загрижува фактот што не се целосно јасни последиците од ова консумирање.

Истражувачите анализирале 26 претходни истражувања во кои се проучувало количеството на микрочестички пластика во риби, школки, шеќери, сол, алкохол, флаширана и вода од чешма, воздух и слично. Потоа тимот експерти пресметал колку вакви честички консумираме во просек.

Резултатите покажале дека човекот внесува помеѓу 74.000 и 121.000 честички микропластика во организмот во само една година, во зависност од возраста и полот.

Сепак, не сите се согласуваат со овие податоци. Професорот по екологија Алестер Грант смета дека ова не треба да го сфаќаме толку сериозно.

„Авторите ја измериле консумацијата на микропластика исклучиво со помош на измерената концентрација во храната и воздухот.

Според ова, изгледа дека возрасниот човек во еден ден внесува 142 честички од устата и вдишува уште 170. Овие големи броеви сепак се годишна прогноза.

Нема докази дека овие износи се значајно штетни за човечкото здравје.“

„Еден од два извори кои ја мерат концентрацијата на честички во воздухот вели дека проучуваните честички се преголеми за човекот да може да ги вдише, па количината на честички кои сепак стигнуваат до нашите бели дробови е многу помала од тоа“, заклучил професорот.

Микропластика се нарекуваат ситните честички пластика кои луѓето неминовно ги консумираат додека јадат или дишат.

Иако ефектите на микропластиката врз човечкото здравје уште се непознати, научниците предупредуваат дека некои од нив се доволно мали да влезат во човечкото ткиво. Оттаму би можеле да предизвикаат имунолошка реакција или да ослободат отровни супстанци.

Спирова С. | Црнобело