Спијте без долна облека и уште 5 совети за интимна хигиена во текот на летните горештини

За време на пеколните горештини потребно е да се обрне особено внимание на интимната хигиена со цел да избегнете несакани инфекции.

Со оглед на тоа што интимните делови се постојано прекриени, а високите температури предизвикуваат прекумерно потење, се создава погодно место за развој на бактерии и габични инфекции. 

Британскиот The Sun во консултација со лекарката Бина Мехта направи список на кои работи треба да бидете особено внимателни.

Во продолжение погледнете на што треба да внимавате со интимната хигиена за да избегнете несакани последици.

Бидете внимателни при изборот на долна облека

Потребна ви е лесна долна облека изработена од памучни материјали. Ако сте на плажа, колку можете побрзо заменете го влажниот костим за капење со сув.

За миење користете само вода

Веќе сите знаат дека интимните делови не треба да се мијат со сапуни затоа што може да ја наруши природната pH вредност и да предизвика прекумерен раст на штетни бактерии и габички.

Ако морате да користите сапун, изберете нежни средства без парфем и практикувајте да се туширате наместо да лежите со часови во када.

Ако сте се препотиле, сменете ја и долната облека

Сите препорачуваат во летниот период да се избегнува излегување во периодот помеѓу 11 и 17 часот, а ако тоа мора да го направите да се држите во сенка.

Доколку пак мора да престојувате на отворено подолг период и ако се препотите, добро е со вас да носите резервна долна облека и да се пресоблечете.

Задолжително пеглајте ја долната облека

Долната облека добро е да ја испеглате за да ја дезинфицирате и да ги убиете сите спори на кандида што не се уништиле во перењето. Ова е задолжително особено ако ја перете облеката на ниска температура.

Легнете си без долна облека

Обидете се во лето под лесните пижами да не носите долна облека за да им дозволите на интимните делови да се проветрат. Изберете поширок, памучен модел на пижами и имајте предвид дека ќе треба често да ги перете.

Избегнувајте бричење пред да одите на плажа

Отворените пори по бричењето може да бидат погодна средина за развој на бактерии и габични инфекции, затоа се препорачува доколку морате да се депилирате или да се бричите тоа да го направите претходната вечер, за кожата да има доволно време да заздрави.

 Б. С. Б. | Црнобело