Чести сексуално преносливи болести и како да се заштитите од нив

Хепатит

Хепатитот е болест која предизвикува воспаление на црниот дроб и фиброза и може да се пренесе на неколку начини, вклучувајќи и сексуален однос.

Постојат неколку видови хепатит – хепатитот А обично се наоѓа во фекални материи, но може да се пренесе и сексуално.

Хепатитот Б може да се пренесе преку телесни течности, користење исти игли и од мајка на дете за време на раѓање.

Хепатитот Ц може да се пренесе преку крв, семена течност и други телесни течности.

Можете да се заразите со хепатит Д преку крв, додека со хепатит Е - доколку го има вирусот во храната или водата што ги консумирате.

Хепатит Б и Ц можат да бидат хронични и многу веројатно е да не се појават симптоми додека не настане оштетување на црниот дроб.

Но, доколку станува збор за акутно заболување, уште веднаш можат да се забележат симптоми.

Некои од најчестите симптоми се замор, темна урина, болка во стомакот, намален апетит, жолта кожа и очи (знак за жолтица).

За да го намалите ризикот од зараза, препорачливо е да се вакцинирате, но засега нема вакцини за хепатит Ц или Е.

Исто така, секогаш користете кондом, а ако сте загрижени дека сте се заразиле, веднаш одете на лекар.

Гонореја

Гонорејата е сексуално пренослива болест предизвикана од бактерија и во голем број случаи не предизвикува симптоми.

Болеста се пренесува преку орален, вагинален и анален секс.

Кај мажите, дел од симптомите се болка за време на уринирање, како и исцедок со бела, жолта или зелена боја. Кај некои мажи, иако поретко, се јавува и болка во тестисите и препоните.

Кај жените исто така има болка при уринирање, како и зголемен вагинален исцедок. Некогаш се јавува и крвавење.

Доколку не се лекува, гонорејата може да предизвика сериозни проблеми со здравјето.

Кај жените може да ги оштети репродуктивните органи и да го зголеми ризикот од вонматерична бременост. Кај мажите, пак, може да го зголеми ризикот од неплодност.

Затоа, препорачливо е да се тестирате ако забележите некој симптом, ако често менувате партнери или сте имале однос со партнер кој ви кажал дека има сексуално пренослива болест.

Според Центарот за контрола и превенција на болести, препорачливо е да се тестирате еднаш годишно ако не сте во моногамна врска.

Болеста може да се излечи со правилна терапија, но ако настане преголема штета, како неплодност, штета ќе биде трајна.

Кламидија

Кламидијата е бактериска зараза која се јавува и кај мажи и кај жени, но кај жените може да предизвика трајно оштетување на репродуктивниот систем.

Болеста се пренесува преку вагинален, анален или орален секс со заразена личност.

Исто така, болеста може да се пренесе од мајка на дете за време на породување.

Ако сте сексуално активни, важно е секогаш да користите кондом, особено ако често менувате партнери.

Добро би било да се тестирате еднаш годишно ако не сте во моногамна врска.

Обично кламидијата не покажува симптоми, но тоа не значи дека не предизвикува штета.

Симптомите можат да се појават и неколку недели откако ќе се заразите, а кај жените вклучуваат обилен вагинален исцедок, како и болка при уринирање.

Кај мажите може да се јави исцедок од пенисот, болка при уринирање, како и болка или отоци кај тестисите.

Денес постојат третмани за кламидија кои можат навреме да ја спречат потенцијалната штета, па препорачливо е редовно да се тестирате ако спаѓате во ризична категорија.

Дури и да не забележувате симптом од некоја сексуално пренослива болест, препорачливо е редовно да се тестирате, посебно ако не сте во моногамна врска.

Исто така, бидете отворени со вашиот лекар, дури и ако ви е непријатно да зборувате за сексуалниот живот, бидејќи само вака навреме ќе ги фатите болестите и ќе ги запрете пред да предизвикаат голема штета.

Спирова С. | Црнобело