Goupil Le Fol – Кафуле во срцето на Брисел кое потсетува на музеј

Детали

недела, 18 февруари 2024

На неколкуте ката и тесните премини и скали ќе откриете ѕидови натрупани со книги, полици со сувенири, еден куп уметнички слики, црно-бели фотографии кои го отсликуваат францускиот живот, фотографии од кралеви и кралици на Белгија, скулптури на Света Богородица и Исус, стрипови за Тинтин...

Секој град има скриени локали кои не се наменети за секого. Тоа се места кои имаат своја посебна приказна на постоење и им се откриваат само на оние што сакаат да избегаат од секојдневието и монотонијата што се прелива околу нив.

Ако периодот патувате во Брисел запомнете ја оваа адреса: Rue de la Violette 22, местоположбата на локалот Goupil Le Fol кој скоро 50 години е збирно место на интересни локалци и залутани туристи.

Локалот е отворен само навечер, поточно од 16 часот па сè до 2 после полноќ. Доволно е да се знае само ова и уште веднаш да добиете желба да влезете во необичните простории на ова кафуле кое се наоѓа близина на Гранд Плас.

Дури и ако случајно поминете покрај Goupil Le Fol, самата фасада може да ви ја заскокотка љубопитноста и да фрлите поглед на она што се наоѓа токму пред вас.   

Мислам дека зборот „волшебно“ е соодветниот збор што го опишува ова кафуле. Позиционирано во самото срце на градот, ова најверојатно ќе биде едно од најуникатните места што некогаш сте ги виделе... Или ќе го видите во Брисел!

Goupil Le Fol е своевиден лавиринт, простор каде се ослободува човечката имагинација и се отвора еден портал кој ќе ни го разбуди детето во себе.

На неколкуте ката и тесните премини и скали ќе откриете ѕидови натрупани со книги, полици со сувенири, еден куп уметнички слики, црно-бели фотографии кои го отсликуваат францускиот живот, фотографии од кралеви и кралици на Белгија, скулптури на Света Богородица и Исус, стрипови за Тинтин...

Тука се и знамињата од различни земји во светот, џубокс со заслепувачки неонски светилки и бројни каучи и фотелји кои се погодни за водење долги дискусии и барање на смислата на животот.  

Понекогаш скоро е невозможно да најдете слободно место во Goupil Le Fol, па мора да чекате да се ослободи некоја маса.

Ова кафуле е идеално за сите оние што сакаат со тивка музика и пријатно друштво да си ја поминат вечерта, а совршено е и за љубовен состанок.

Мислам дека местото дава уште поголема длабочина на секој сегмент и секој изговорен збор таа вечер.

Со чаша вино, пиво или некој од бројните коктели, дајте си можност да се почувствувате како лик од некој авантуристички роман кој ќе ве одведе до богатството по коешто трагате со години!

Продолжува на следната страница...