Грешки во уредувањето што е најдобро да ги избегнете – може да ве чинат многу

Големо растојание меѓу завесата и подот, но и евтини лајсни на подот помеѓу кујната и дневната кои го нагрдуваат просторот.

Навистина е важно да избегнете што е можно повеќе грешки кога го уредувате домот бидејќи, неретко, нивното коригирање може да чини многу.

Дури и ако е ситница, како лошо избрана завеса, може да ве чини повеќе од планираниот буџет.

Па, кои се грешките на кои треба да обрнете внимание?

Големо растојание помеѓу завесата и подот

Иако ова е ситница, навистина „паѓа“ во око.

Ако завесата почнува повеќе од десет сантиметри над подот, собата може да изгледа пониско.

Најдобро е или завесата да допира до подот, или да биде само сантиметар-два над него.

Еден извор на светлина во целата соба

Лустерот во средина на таванот веќе се смета за „реликвија“ и делува застарено.

Во многу мала просторија, во ред е да ставите еден лустер на средината кој ќе одговара со дизајнот на собата, но додајте и друг извор на светло, како столна или подна ламба.

Во поголеми простории, подобро ќе изгледаат повеќе извори на светлина на таванот.

На пример, ако ви се споени дневната соба и трпезаријата, на двете места нека има по еден лустер.

Секако, и во овој случај не ги заборавајте столните и подните ламби.

Гарнитура залепена до ѕидот

Ова, секако, зависи од големината на собата.

Ако дневната е мала, тогаш е логично гарнитурата да биде поставена до ѕидот.

Но, во поголем простор, ваквиот распоред ја остава средината на собата празна и се нарушува хармонијата на ентериерот.

Црни чешми и цевки

Точно е дека изгледаат стилски, но црните чешми и цевки се кошмар за чистење.

На нив ќе се познава бигор и од само една капка вода и ќе треба постојано да ги чистите.

Дрво во различни нијанси

Ако измешате дрвени елементи во неколку различни нијанси, ќе создадете визуелен хаос.

Во секоја просторија, дрвените елементи треба да бидат со иста нијанса за просторот да делува хармонично и средено.

Лошо одделени плочки од ламинат (или друг под)

Денес во становите обично кујната и дневната се во иста просторија. И, навистина е важно како ќе ги одделите подот од кујната и подот од дневната.

Вложете во квалитетни лајсни чиј дизајн ќе се вклопи со ентериерот на кујната и дневната, но и ќе ги заштитат подовите.

Спирова С. | Црнобело