Најбрзи и највкусни појадоци

Заради утринското брзање, појадокот често пати го прескокнуваме. Па, ако и денес сте во гужва, еве неколку идеи кои ќе ви помогнат да подготвите едноставен појадок.

Јајце во леб

Состојки: 1 дебело парче леб, 1 јајце, крем сирење, сол, масло

Подготовка: Парчето леб премачкајте го со крем сирење, а потоа на него ставете го јајцето. Разматено или не, изборот е ваш. По желба зачинете и посолете, премачкајте го парчето леб со масло и ставете го во рерна на 220 степени, 15 минути.

Паштета од сардина и јајца

Состојки: 1 конзерва сардина, 2 јајца, 1 лажица мајонез, 1 лажица сенф, магданос, сок од ½ лимон, сол

Подготовка: Исцедете ја сардината, а потоа изгмечете ја со виљушката и полијте ја со сок од лимон. Додајте ги варените јајца и повторно изгмечете. Сенфот, мајонезот и сечканиот магданос соединете ги на крај и посолете по желба.

Намаз од јајца и сланина

Состојки: 4 тврдо варени јајца, 200g сланина, 1 лажица путер, 6 кисели краставички

Подготовка: Во блендер измешајте ја сланината со сите останати состојки додека не добиете густ намаз. Посолете и зачинете по желба.

Полнети јајца

Состојки: 4 јајца, 50g путер, бибер, сол, магданос

Подготовка: Сварете ги јајцата и одвојте ги жолчките од белките. Во растопен путер додајте ги изгмечените жолчки, сол, бибер и ситно сечкан магданос. По желба, може да додадете изронето сирење или малку павлака.