Што да направите со јајцата кои пукнале за време на фарбањето?

Се прашувате што да правите со сите оние јајца кои ви пукнале додека се обидувавте да ги обоите?

Одговорот е едноставен и многу вкусен - спремете полнети јајца и збогатете ги со свеж зеленчук, зачини, димен лосос...

Потребни состојки за основниот рецепт за полнети јајца (за 8 јајца)

• 1/3 филџан мајонез
• 1 супена лажица сенф
• 1 супена лажица бел оцет
• Сол и бибер

Подготовка:

Сварените јајца исчистете ги и пресечете ги на пола, тргнете ги жолчките и ставете ги во сад.

Жолчките истолчете ги со вилушка и помешајте ги со мајонез, сенф и оцет и зачинете ги со сол и бибер. За да добиете сосема хомогена смеса, кратко изматете ја со миксер.

За да не ви бидат сите јајца со ист вкус, поиграјте се со состојките кои ги имате дома.

Јајца со маслинки и лук

Во однапред подготвената смеса за основен рецепт додадете три-четири исечкани маслинки и неколку чешниња лук и убаво изблендирајте ги сосојките.

Смесата ставете ја во кесичка за украсување торти и наполнете ги половината од белките. Немојте да заборавите да ги украсите јајцата со парчиња маслинки.

Јајца со лосос и ротквици

Во блендер ставете ги состојките за основната смеса и додадете им парчиња димен лосос. Изблендираната смеса ставете ја во кесичката за украсување, наполнете ја останатата половина од белките и украсете со парчиња ротквици и магдонос.