Брзи, мрзливи ручеци за викенд

Ладните денови се идеално време за подготвување на вкусни и брзи рецепти кои ќе ви ја загреат душата, без многу мака и потрошено време. Со нив бргу ќе можете да седнете пред на семејната трпеза или каучот и да уживате во нешто сочно.

Еве неколку брзи предлози:

Гиро пита како пица

Едноставно не сакате да чекате да ви се одмрзне готовото тесто или да чекате да „стаса“ тесто кое претходно вие треба да го подготвите? Гиро питите се одлична замена за тестото за пици, а и далеку побргу ќе г подготвите.

Потребни состојки (за едно лице):

• 2 парчиња гиро пита
• 1 - 2 лажички маслиново масло
• 4 - 5 лажици сос од домати
• 1 шолја рендан кашкавал
• Сувомесен производ по желба
• Пармезан по желба

Подготовка:

Загрејте ја тавата на тивко, ставете едно парче гиро пита на маслиновото масло и веднаш нанесете тенок слој од сосот од домати и слој кашкавал.

Потоа ставете ја и втората гиро пита.

Со еден брз потег превртете ги.

Потоа нанесете уште еден слој кашкавал и салама или кулен по желба.

Почекајте да се стопи и горниот слој кашкавал додека не добие златно жолта боја.

Декорирајте со пармезан по желба.

Мини солени ролати со топен кашкавал

Ако сте страсен уживател на топен кашкавал, тогаш малите ролати од леб со топен кашкавал се идеален предлог за вас.

Потребни состојки:

• 6 парчиња леб за тост
• 1 лажица путер
• 6 парчиња кашкавал

Подготовка:

Исечете ја кората од парчињата леб и натапкајте ги со чинија за да можете полесно да ги направите како мини ролат. На нив ставете ги парчињата кашкавал и направете мали ролати.

На претходно загреана тава ставете го путерот, почекајте да се растопи, а потоа ставете ги мини ролатите со кашкавал.

Пржете додека не се стопи кашкавалот внатре, а горниот слој од лебот не крцка.

Детално погледнете го видеото за подготовката:

Потпечени макарони со топен кашкавал

Потребни ќе ви бидат само 30 минути, а ќе добиете вкусен и сочен солен рецепт кој ќе му се допадне на целото семејство.

Потребни состојки:

• 6 лажици путер
• 6 парчиња леб
• 5 ½ шолји млеко
• ½ шолја брашно
• 2 лажички сол
• Лажичка бибер
• 2 шолји кашкавал
• 1 пакување макарони

Подготовка:

Загрејте ја рерната на 190 степени.

Во мала тава ставете го путерот да се растопи и на нив со брзо мешање додадете го брашното сè додека не добиете компактна смеса. На нив додавајте го полека со мешање млекото додека повторно не добиете компактна густа смеса како сос. Во неа ставете ги зачините.

Во лонец 2 – 3 минути варете ги макароните на зовриена вода, а потоа процедете ги и додадете ги во сосот. Додадете ги и шолјите рендан кашкавал. Добро промешајте.

На крајот додадете ги парчињата леб кои претходно сте ги исечкале на коцки.

Вака подготвените макарони оставете ги да се печат во рерна 30 минути.

На здравје!