Нов тренд за летната сезона: Пица од лубеница

Без да погледнете во сликите, зборчињата „пица“ и „лубеница“ сигурно не ви одат во иста реченица. Па дури можеби идејата ви звучи ужасно. Но, кога ќе видите за што станува збор, сигурни сме дека овој ладен и креативен оброк, ќе ви биде фаворит ова лето.

Малите триаголни парчиња лубеница служат како „тесто“ од пица. Јогурт или крем сирење е замена за сос на пицата, а додатоците ги оставаме на вашата имагинација.

Дали ќе ги направите солени или слатки, нека остане ваш избор, во зависност од вкусот и желбата.

Солена пица од лубеница

Исечете ја лубеницата хоризонтално на парчиња со дебелина од 2-3 cm. Врз лубеницата ставете фета сирење и парчиња пиперка.

Ставете малку црн пипер, истискајте малку сок од лимон и прелијте ја со мала лажичка мед. На лубеницата можете да одземете или да додадете и други работи, по ваш вкус.

Сервирајте ја лубеницата во триаголни парчиња, како што би направиле и со обична пица.

Слатка пица од лубеница

Во мал сад размешајте малку крем сирење, мед и ванила. Ставете ја смесата врз лубеницата и одозгора наредете јагоди, малини, капини, нане, кокос и други додатоци, по ваш избор.

Сервирајте ја лубеницата во триаголни парчиња како што би направиле и со обична пица.

А. В. | Црнобело