Француски десерт со чоколадо, за кој не ви требаат кори и филови

Овој рецепт може да го сместиме на листата на десерти кои дури и почетник во кујната може да ги подготви, бидејќи не треба никакво матење на фил или редење кори.

Се работи за модифициран француски тост, однадвор крцкав, а внатре полн со чоколадо и овошје.

Се прави во голема количина, па сигурно без проблем ќе заслади неколкучлено семејство или друштво.

Потребни состојки:

• 2 пакетчиња леб (или зависно од големината на тавата)
• 3 јајца
• 1 шолја слатка павлака
• ½ шолја млеко
• 3 лажички шеќер
• 1 лажичка екстракт од ванила
• 500g овошје по желба, во случајов јаготки исечкани на кругови
• 300g ситно сечкано чоколадо
• Шеќер во прав за декорација

Подготовка:

Загрејте ја рерната на 180 степени додека го подготвувате десертот.

Изматете ги јајцата со павлаката, млекото, шеќерот и ванилата. Убаво потопете ги лепчињата во течноста и наредете ги на тава, преклопени со краевите.

Наредете го овошјето, па потоа сечканото чоколадо. Покријте со уште еден ред лепчиња потопени во смесата од јајца.

Печете 25 минути на 180 степени, максимум 30 доколку сакате да бидат покрцкави.

Извадете го десертот и додека е уште топол, проросете со шеќер во прав.

Може да послужите со топка сладолед или уште овошје.

М. Д. | Црнобело