Домашни интегрални стапчиња - здрави грицки за помалку од половина час

Кога нешто ви се грицка по дома, а избегнувате брза храна - еве еден предлог за здрава ужина.

Погодни за ужина, за на работа или за неочекувани гости - овие грицки се вкусен и здрав додаток без опасност од вишок килограми.

Подготовката нема да ви одземе повеќе од 30 минути, а основниот рецепт може да го модифицирате според сопствен вкус!

Од оваа количина ќе направите околу 50 стапчиња или топчиња.

Потребни состојки:

• 250 g интегрално брашно
• 250 g бело брашно
• 1 ќесичка прашок за печиво
• 200 ml газирана вода или пиво
• 1/4 шолја масло
• 100 g лупен сончоглед
• 100 g ленено семе
• 50 g ким
• 100 g сусам
• сол по вкус

Начин на подготовка:

Ставете ги сите состојки освен сусамот во длабок сад и замесете тесто. Доколку е тестото лепливо, додадете брашно по потреба, сè додека не се создаде хомогена смеса.

Од тестото почнете да одвојувате делови кои може да ги замесите во форма на топчиња или стапчиња. Наредете ги на плех претходно обложен со хартија за печење и посипете ги со сусам.

Се печат во претходно загреана рерна на 180°С до 20 минути.

Овој рецепт може да го модифицирате со разни додатоци - семки од тиква, рузмарин, крупна морска сол, урда итн. Добар апетит!

А. Т. | Црнобело