Корисни трикови за „од око“ да ги изберете најсвежите производи на пазар

Бирајте млади тиквички

Бирајте тиквички со мазна кора, на кои нема гребнатини или пукнатини.

Запомнете: колку тиквичката е посвежа, толку нејзината кора е помазна, а тоа значи дека има помали семки и е повкусна за јадење.

Морковите со зелени делови се најдобри

Кога бирате моркови секогаш барајте ги оние помалите, затоа што се посочни и повкусни.

Дополнително, барајте моркови на кои не им се откинати зелените делови, затоа што тие најлесно ќе ви укажат дека станува збор за свежи производи што не биле долго време во магацин.

Исто така, морковите што се кафеави најверојатно биле долго време чувани во магацин, а оние кои имаат пукнатини најверојатно се презреани.

Помалите модри домати се повкусни

Убавите модри домати имаат сјајна кора. Ако имаат мат боја на кората, тоа значи дека најверојатно не биле чувани добро, па може да немаат добар вкус.

На допир, модрите домати треба да бидат цврсти, да немаат меки делови, а за да бидете сигурни дека нема да горчат најдобро е секогаш да ги бирате помалите плодови.

Објаснувањето за тоа е едноставно: поголемите плодови зрееле подолго време, имаат повеќе семе и заради тоа може да горчат.

Кога купувате цреши, внимавајте на мирисот

Темноцрвените цреши најчесто се поблаги од светлоцрвените, но имаат помал рок на траење.

Исто така, внимавајте на мирисот што се шири. Доколку забележите мирис на вино, тоа значи дека најверојатно станува збор за стари плодови и дека процесот на ферментација веќе започнал.

Погледнете го коренот на ротквичката

Кога бирате ротквички, погледнете ги убаво врвовите на корените. Ако врвот на коренот е свеж и светол, тогаш станува збор за свежи производи. Оние со овенати корени најчесто се стари или не биле чувани правилно.

Ротквичките треба да бидат цврсти, без пукнатини и при допир не би требало да почувствувате празнини.

Б. С. Б. | Црнобело