Како да препознаете кога авокадото е зрело и како да го чувате правилно?

Обично авокадата во продавниците не се зрели, па откако ќе ги купите треба да почекате неколку денови. Проблемот е што после неколку денови можеби и ќе заборавите дека сте купиле авокадо, па ќе го испуштите краткиот период кога тоа е добро за јадење и, на крај, ќе мора да го фрлите.

Ако сте љубител на авокадо сигурно сте се нашле во ваква ситуација, и тоа неколкупати, па веројатно ќе ве интересира како е најдобро да го чувате дури да дојде време да го јадете.

Како да препознаете дали авокадото е зрело за јадење?

Како бананите и доматите, и авокадото е овошје кое продолжува да зрее откако ќе се набере. А откако ќе го купите, можете да одредите дали е зрело набљудувајќи ја неговата боја, но и неговата цврстина.

Само, кога ќе ја проверувате цврстината, немојте да го притискате со прстите, туку нежно притиснете го авокадото со целата дланка. Во спротивно голема е веројатноста да се појават темни дамки на местата каде што сте го притиснале со прстите.

Незрелото авокадо има светло зелена боја и е цврсто на допир. Ако купите вакво авокадо, обично ќе му требаат 4-5 дена за да созрее.

Речиси зрелото авокадо има малку потемна боја и е малку помеко од зеленото. Во овој случај му требаат уште ден-два за да созрее.

Зрелото авокадо е меко на допир и има темнозелена боја.

Презреаното авокадо има речиси кафена боја и е многу меко на допир. Не е проблем да го изедете и во оваа фаза, но вкусот дефинитивно ќе му биде променет.

Како најдобро да го чувате авокадото?

Постојат неколку начини на чување, во зависност од зрелоста на авокадото и тоа кога планирате да го јадете. Ако, на пример, сакате да го забавите зреењето, тогаш е најдобро да го чувате во фрижидер. Ако, пак, сакате да го изедете побрзо, можете да го чувате во хартиена кеса со овошје кое исто така зрее откако ќе се набере – како банана.

Зеленото авокадо можете да го чувате на собна температура, но само ако планирате да го изедете за 4-5 дена. Ако го чувате во фрижидер, ќе го забавите овој процес и ќе му го продолжите рокот на траење до околу две недели.

Зрелото авокадо би требало да го изедете веднаш. Сепак, можете да го чувате и во фрижидер, но не подолго од ден-два.

Исеченото авокадо може да потемни поради кислородот, па ако сакате да го чувате неколку денови, напрскајте го со лимонов сок или оцет и ставете го во фрижидер.

На овој начин ќе ја забавите реакцијата помеѓу воздухот и ензимот што го предизвикува потемнувањето. Можете и да го завиткате пресеченото авокадо во пластична фолија и да го ставите во фрижидер. Сепак, не очекувајте долго да истрае.

Спирова С. | Црнобело