Дали навистина медот треба да се црпи со дрвена, а не со метална лажица?

Дали медот навистина ги губи хранливите состојки од металната лажица или ова е само мит?

Од вашите баби веројатно имате слушнато дека никако не треба да користите метална лажица за мед.

Според старите верувања, поради металната лажица медот може да изгуби дел од хранливите состојки. Некои, пак, веруваат дека металот од лажицата може да рѓоса и да го направи медот штетен.

Па, колку вистина има во сето ова и дали навистина не смеете да користите метална лажица за мед?

Верувањето дека медот ги губи хранливите состојки од металната лажица не е поткрепено со никакви истражувања.

Кога и самите ќе размислите подобро, навистина нема логика како медот би ги изгубил хранливите состојки ако само неколку секунди стои во метална лажица.

Ова значи дека верувањето за хранливите состојки на медот е сепак само мит.

Кoга станува збор за корозијата, односно рѓосувањето на лажицата, ова е делумно вистина.

Медот има pH-вредност помеѓу 3,4 и 6,1, а ова го прави кисела храна, односно кисел раствор.

На рН скалата, сè што има вредност помала од 7 се смета за кисел раствор. Вредноста 7 означува неутрален раствор, додека растворите со вредност поголема од 7 се алкални или базни.

Веројатно поради киселоста на медот се појавило верувањето дека тој може да предизвика кородирање на металот од лажицата.

Но, за да се случи ова, лажицата ќе треба да стои во медот многу долго време.

Што значи, додека црпењето мед со метална лажица не предизвикува никаква штета, не е препорачливо да ја оставате металната лажица внатре во медот.

Од истите причини, не е препорачливо да го складирате медот во метални садови.

Дали е подобро да користите специјална црпалка за мед?

Специјалните црпалки за мед можат да бидат попрактични, но не поради материјалот од којшто се изработени.

Овие црпалки се направени од дрво, но има и пластични модели.

Она што ги прави практични е нивната форма.

Поради големата вискозност, медот може да биде проблематичен за црпење. Но, овие црпалки го „заробуваат“ во нивните празнини, па го прават црпењето полесно.

Но секако, не значи дека се неопходни и слободно можете да продолжите да користите метална лажица, сè додека не ја оставате во медот.

Спирова С. | Црнобело