8 едноставни трикови кои ќе ви заштедат многу време додека готвите

Паметно организирајте ја кујната, однапред подгответе ги состојките и пробајте да чистите додека готвите.

Некогаш помислата дека готвењето ќе ни одземе многу време нè одвраќа од намерата сами да си направиме оброк.

Но, постојат многу трикови кои ќе ви помогнат да го скратите времето на готвење

Неколку од нив во продолжение:

Паметно организирајте ја кујната

Потрудете се секој сад и предмет во кујната да ви биде при рака кога ќе ви треба.

На пример, тавите и тенџерињата ставете ги во близина на шпоретот. Истото важи и за зачините што ги користите најчесто.

Ножевите и даската за сечење нека бидат што е можно поблиску до помошната маса и слично.

Користете ги уредите ефикасно

На овој начин ќе заштедите време додека готвите, но и додека чистите.

На пример, рачниот блендер е одличен за правење крем-супи, сосови и слични рецепти.

Од друга страна, „обичниот“ блендер е многу поефикасен за смутија.

Користете состојки што се приготвуваат брзо

Некогаш е подобро да замените некои свежи состојки со конзервирани или замрзнати.

Одличен пример за ова се доматите.

Ако правите сос за тестенини и користите свежи домати, прво ќе треба да ги измиете, па да ги исечете или изрендате, па дури потоа да ги ставите во тава. Истовремено, ќе треба и подолго време додека да се зготват.

Од друга страна, конзервираните домати имаат речиси ист вкус, а ќе ви ги преполоват обврските и времето на готвење.

Читајте ги рецептите до крај пред да почнете со готвење

Мора да ги знаете сите чекори од некој рецепт пред да почнете да готвите.

Можеби, на пример, треба да чекате 10-тина минути да се загрее рерната или можеби некои состојки треба да отстојат на собна температура или ќе треба 4 часа да се замрзнува и слично.

Кога ќе ги знаете сите чекори, подобро ќе го организирате времето и готвењето ќе трае пократко.

Исечете го месото на потенки парчиња

Можете значително да го скратите времето на готвење ако го исечете месото на потенки парчиња.

Однапред подгответе ги сите состојки

Ако знаете што ќе јадете во наредните неколку денови, можете некои состојки да подготвите однапред.

На пример, исечете го зеленчукот и ставете го во добро затворен сад за храна. Потоа само додајте го во рецептот.

Ставете капак врз тенџерето

Освен ако рецептот не нагласува дека тенџерето треба да биде отворено, секогаш ставајте го капакот.

Кога тенџерето е затворено, топлината од него нема да излегува и храната ќе се зготвени побрзо.

Средувајте ја кујната додека готвите

Наместо да чекате до крај и да направите хаос во кујната кој ќе треба да го средувате барем половина час, пробајте да чистите додека готвите.

На пример, штом ќе го исечете зеленчукот, веднаш фрлете ги остатоците и измијте ја даската.

Спирова С. | Црнобело