Огромни бранови во Грција: Застрашувачки сцени и спасувачки акции на Лефкада и Патра, се удави синот на познат грчки актер во Фурни

Детали

петок, 11 август 2023

Едно момче било најдено удавено во Грција, на островот Фурни, а на социјалните мрежи се објавени видеа од две одделни спасувачки акции со туристи што заради силните морски бранови и струи биле заробени во морето. Грчките медиуми објавуваат предупредувања - туристите да не влегуваат во вода кога временските услови не се погодни за тоа.

Деновиве беа забележани големи бранови во водите на грчките мориња, заради што на социјалните мрежи и во медиумите се објавени повеќе предупредувања со туристите да бидат особено внимателни.

Во вторникот (08.08) спасувачките служби на плажата Kathisma на Лефкада мораа да интервенираат кога 5 кајаци беа заглавени на околу 400 метри од брегот и не можеа да се вратат на брегот заради лошите временски услови.

Благодарение на брзата интеревенција на властите 4-членото семејство и странскиот водич на групата биле пренесени на брегот.  

Според пишувањата во грчките медиуми, водичот бил странски државјанин кој во лоши временски услови им ги изнајмил кајаците на туристите, а немал соодветна дозвола за изнајмување возила за рекреација, што е задолжителна во Грција.

Според пишувањата во грчките медиуми, странскиот водич се соочува со казна затоа што ги прекршил законите во Грција, тој во моментов е сместен во затвор, а дополнително против него ќе бидат поднесени соодветни прекршочни казни.

Во продолжение погледнете го видеото од спасувачката акција:

На Фејсбук групата „Грчка инфо“ се објавени уште неколку видеа од спасување на две девојчиња кои биле на возраст од 14 и 15 години, во Патра, во близина на мостот Рио Антирио.

Заради силните морски струи девојчињата биле одвлечени подалеку од брегот и не можеле да се вратат.

Голем број возрасни на брегот се обиделе да ги спасат девојчињата, а потоа и самите останале заробени во морските води.

На крај сите биле спасени со помош на траект и глисер.

/

/

/

Покрај овие видеа од спасување, во грчките медиуми е објавена веста за трагедијата што се случи на островот Фурни, каде почина 11-годишниот син на грчкиот актер Одисеис Стамулис.

Момчето излегло од дома околу 2 часот попладне, а мајка му околу 6 часот го пријавила за исчезнато во полиција.

Момчето било најдено од локален жител во близина на пристаништето со маска на лицето и костим за капење, по што било пренесено во болница, а таму била констатирана смрт.

Б. С. Б. | Црнобело