„Љиљана навистина постоеше, но нејзиниот сопруг почина, а не таа“ – Сопругата на Тома Здравковиќ ја открива вистината за песната

Детали

вторник, 17 октомври 2023

Тома не ја напиша песната „За Љиљану“, а вистината е дека така се викаше сопругата на лекарот што го лекуваше... Пред премиерата на серијата што надолго ќе го раскажува животот на познатиот пејач, повторно се актуелни деталите што ја потресоа и ја расплакаа балканската јавност од животот на познатиот пејач.

Пред 2 години балканската јавност го следеше филмот „Тома“, а оваа есен српската јавност со нетрпение го очекува и емитувањето на серијата посветена на познатиот музичар, во која низ 10 епизоди ќе има можност подетално да го проследат неговиот живот, но и контактот што тој го имал со голем број други познати јавни личности од Србија.

Во филмот, имавме можност да ја проследиме носталгичната и емотивна приказна за Тома Здравковиќ, кој маестрално беше одигран од Милан Мариќ, а беше опфатена златното доба на народната српска музика и се појавија повеќе тогашни музички ѕвезди: Силвана Арменулиќ, Лепа Лукиќ, Предраг Живковиќ Тозовац, Цуне Гојковиќ итн.

Во серијата, пак, ќе имаме можност да ги видиме и Драган Николиќ, Бора Тодоровиќ, Зоран Радмиловиќ, Кемал Монтено, а ќе бидат опфатени и четирите браќа на Тома и најважните жени во неговиот живот.

Војин Четковиќ во улогата на Драган Николиќ

Она, што на сите им остави впечаток во филмот беше емотивната сцена за тоа како настанала песната „За Љиљану“, а режисерот на филмот Зоран Лисинац, уште по премиерата на филмот рече дека станува збор за фикција.

„Размислувавме да ја исфрлиме таа сцена затоа што сметавме дека може да го оттргне вниманието од главниот јунак. Меѓутоа, на наша радоста, таа сцена остана и таа секако ни е една од подрагите.

Го имавме од една страна докторот, а од друга страна неговата сопруга. Сѐ настана сосема спонтано. Сопругата на докторот требаше да се вика Вера, но ние ја нарековме Љиљана“ – рече тој.

Иако, набрзо по излегувањето на филмот многумина пишуваа дека сцената во целост е измислена и дека песната е посветена на актерката Љиљана Благојевиќ и дека Тома ѝ ја напишал песната на салфетка, неговата последна сопруга Гордана, има сосема поинакво тврдење.

Гордана, набрзо потоа даде едно сосема поинакво објаснување и изјави:

„Тома не ги напиша зборовите на таа песна, тој ја отпеа и ја направи музиката. Ако ја земете плочата, ќе видите дека тој не е автор на тој текст.

Не можам точно да се сетам чија е таа песна, но тој не ја напиша“ – изјави таа.

Инаку, вистината е дека автор на таа песна е Светозар Балтиќ и дека Тома само ја отпеал, а Гордана во едно гостување неодамна откри дека режисерот на филмот направил уште една измена на приказната од реалноста за совршено да се спојат „коцките“ и приказната да го има посакуваниот емотивен ефект.

Српските медиуми ја пренесуваат изјавата на Гордана за тоа, како името Љиљана е поврзано со животот на Тома и во која мера филмот ја следи реалноста.

„Љиљана во вистинскиот живот беше сопругата на докторот што го лекуваше Тома. Таа беше докторка на одделот за нефрологија.

Во филмот дејствието е заменето. Вистината е дека докторот почина и дека Љиљана остана жива.

Но, всушност сѐ она што го го гледате го имало и во вистинскиот живот“ – рече таа.

Оттука јасно е дека режисерот инвентивно успеал да ги склопи песната што ја отпеа Тома со приказната од реалноста за да ја склопи најемотивната сцена во филмот.

Прочитајте и „Го гледав филмот Тома - ремек дело, емоција, не можам да се соземам, уште гуглам за него“

Б. С. Б. | Црнобело