Растел во поправни домови, внукот ја убил сестра му - Потресни факти за животот на Џеј Рамадановски

Детали

сабота, 04 ноември 2023

Детството го поминал во поправни домови, а затоа што бегал постојано од институциите за превоспитување - го испратиле на воен рок на остров во Хрватска. Преживеа семејна трагедија кога внукот ја уби сестра му –  Факти за животот Џеј Рамадановски што можеби не сте ги знаеле.

Српската публика и публиката од регионот со нетрпение го очекува новиот биографски филм за Џеј Рамадановски, легендарниот српски фолк пејач кој почина во 2020-та година.

Неговата животна приказна е исполнета со голем број емотивни моменти, а како што може да се види од првиот трејлер за филмот, публиката ќе има можност да проследи како изгледало детството на малото момче од белградската населба Дорќол, сѐ до мигот додека да стане едно од најпознатите имиња на српската и балканската музичка сцена.

Филмот е насловен по една од најпознатите песни на Џеј Рамадановски „Недеља“, а во него игра и нашата актерка Емра Куртишова, на која ѝ припадна честа да ја толкува улогата на мајката на пејачот.

Во продолжение да проследиме неколку интересни факти за пејачот, што можеби не сте ги знаеле:

Џеј Рамадановски бил роден во 1965-та година во повеќечлено ромско семејство во белградската населба Дорќол. Неговиот татко Мазлам е со потекло од Македонија и по професија бил чевлар, а мајка му Барија работела во комуналното претпријатие „Зеленило“.

Татко му Мазлам свирел на кларинет, а мајка му Барија танцувала и тие двајца се запознале на пробите во културно уметничкото друштво „Никола Тесла“.

 

Во 1972-ра година Џеј се запишал во прво одделение и завршил со одличен успех. Мајка му Барија во овој период се трудела Џеј да биде педантен ученик и во училиште да оди секогаш со испеглани панталони.

Но, набрзо дошло до пресвртница во животот на младиот Џеј. Татко му одлучил да се пресели во Австрија и се развеле со мајка му. Џеј прво заминал со татко му во Австрија, но откако не успеал да го заврши второто одделение, татко му одлучил да го врати во Белград.

Кога се вратил во Белград, Џеј живеел со баба му Даница, а мајка му со сестрите живеела неколку куќи подалеку од него. Во овој период тој почнал да бега од дома, цел ден сакал да го поминува на улица и да игра џамлии, да ги троши парите на баба му, а во овој период почнал и да краде од џебови по улиците.

Мајка му, Барија, кога ќе го видела на улица му удирала шлаканица и се трудела на секој начин да го доведе во ред, но не ѝ успевало, заради што тој бил пратен на превоспитување во дом за малолетници.

Џеј бил снаодлив, па успевал да побегне од секој дом каде што ќе го ставеле, но најмногу се задржал во домот „Васа Стајиќ“ на Вождовац. Таму останал цели 9 години и завршил автолакерски занает, па на шега знаеше да каже дека бил „уметнички декоратер за лимузини“.

Со оглед на тоа што постојано бегал од институциите, на служење воен рок го пратиле на хрватскиот остров Вис, каде поминал 6 месеци, по што добил прекоманда во градежничкиот вод во Сплит.

Во Сплит, Џеј им рекол на надредените дека повеќе сака да го стават во самица, отколку да му дадат лопата, по што бил поштеден од тешките работни задачи.

Џеј добил задача да ги чува пушките додека останатите војници копаат, но тој повторно се снашол и им плаќал на другите војници да ја завршуваат неговата задача, додека тој одел да краде низ градот.

Во едно интервју даде изјава дека во тој период заработил толку многу што на татко му му купил машина за перење облека и плочки за купатилото. Исто така, тој велеше дека не се срами од своето минато затоа што тоа сѐ придонело да израсне во таков човек каков што станал.

Продолжува на следната страница...