Самка (70) и Хатиџа (81) се модни икони од Сараево: „Постарите жени немаат волја да се дотеруваат, сакаме да ги инспирираме“ (фото)

Детали

понеделник, 18 декември 2023

Самка и Хатиџа од Сараево се најдобри пријателки со впечатлив стил кои велат дека имаат за цел да ги инспирираат жените, дури и оние повозрасните, да не го запоставуваат својот изглед. Двете дами истакнуваат и дека за добар стил не ви се потребни многу пари, туку само креативност.

Самка и Хатиџа се две повозрасни дами од Сараево кои се доказ дека годините се само број.

Тие се модни икони или, како што се опишуваат самите, тие се најдобри пријателки кои сакаат да се дотеруваат и ја сакаат модата.

70-годишната Самка и 81-годишанта Хатиџа се истакнуваат со впечатливите модни комбинации, а од неодамна имаат и заеднички Инстаграм профил каде што ги покажуваат нивните аутфити.

Комбинациите на двете дами скоро секогаш се во впечатливи бои и зрачат елеганција

Според босанските медиуми, двете дами се неразделни откако се запознале и велат дека целта им е да им бидат модна инспирација на дамите од Сараево.

Извесен период, Самка живеела во САД, а по пензионирањето решила да се врати во Босна и Херцеговина.

Кога се вратила, била изненадена кога забележала дека повеќето повозрасни дами не обрнуваат внимание на својот стил.

„Не ми се веруваше дека жените изгубиле волја (да се дотеруваат). Порано, жените од Сараево важеа за најубави и најдотерани“, вели таа.

Двете дами велат и дека за добар стил не се потребни многу пари, туку креативност.

„Нам не ни требаат многу пари, туку малку креативност… Јас никогаш не би купила нешто само бидејќи велат дека е модерно. Ако нешто добро ви стои вам, не значи дека е ми стои и мене.

Многу жени грешат со бојата на косата. Тоа е најголем проблем бидејќи бојата на косата одредува какви бои на облека ќе можете да носите.

Секоја жена се чувствува подобро кога ќе се среди. Тоа е мое мислење. Јас секогаш велам дека жената не е родена за само да сто покрај шпоретот и да чисти. Мора да води грижа за себе. Штом се сакате себеси, ги сакате и луѓето околу вас“, вели Самка.

Двете пријателки велат дека се свесни дека повеќето жени не можат да си дозволат скапа брендирана облека и истакнуваат дека брендот воопшто не го одредува стилот.

„Имам совет за жените. Речиси секоја жена има пет-десет пара чевли кои со години не ги облекува. Па, подобро да купи едни квалитетни и да не ги соблече и секогаш ќе изглед добро во нив. Мене ми е важно чевлите, чантата и капутот да ми бидат квалитетни“, вели Хатиџа.

Таа додава и дека со малку креативност, и најевтината облека може да изгледа добро.

Повеќе фотки од модерните дами:

Спирова С. | Црнобело